‘இந்திய சினிமாவின் டானுடன்’: ரஜினியை சந்தித்த சிவகார்த்திகேயன்

சூப்பர் ஸ்டார் ரஜினிகாந்தை நேரில் சந்தித்த அனுபவத்தை நடிகர் சிவகார்த்திகேயன் திங்கள்கிழமை டிவிட்டரில் பதிவு செய்துள்ளார்.

சிவகார்த்திகேயன் புரொடக்‌ஷன்ஸ் மற்றும் லைகா நிறுவனம் இணைந்து தயாரித்த டான் படத்தை அறிமுக இயக்குநர் சிபி சிக்ரவர்த்தி இயக்கினார். இசை - அனிருத். டாக்டர் படத்துக்குப் பிறகு இந்தப் படத்திலும் சிவகார்த்திகேயனுடன் இணைந்து நடித்தார் ப்ரியங்கா மோகன். எஸ்.ஜே. சூர்யா, சமுத்திரக்கனி, சூரி, ஷிவாங்கி, முனிஷ்காந்த் போன்றோரும் டான் படத்தில் நடித்தார்கள். 

சமீபத்தில் வெளியாகி ரசிகர்களின் வரவேற்பைப் பெற்ற டான் படம் 12 நாள்களில் உலகளவில் ரூ. 100 கோடி வசூலை அள்ளியதாக அதிகாரபூர்வமாகத் தகவல் தெரிவிக்கப்பட்டது. 

இந்த படத்தை பல்வேறு பிரபலங்கள் சிவகார்த்திகேயனை பாராட்டி வரும் நிலையில், நடிகர் ரஜினிகாந்த் சிவகார்த்திகேயனை நேரில் அழைத்து பாரட்டியுள்ளார்.

இதுகுறித்து சிவகார்த்திகேயன் வெளியிட்ட டிவிட்டர் பதிவில்,

“இந்திய சினிமாவின் டானை சந்தித்து, அவரின் ஆசிர்வாதத்தை பெற்றேன். அந்த 60 நிமிடங்கள் வாழ்வில் மறக்க முடியாத நினைவுகள். டானை பற்றிய உங்கள் பாரட்டிற்கும், நேரத்தை ஒதுக்கியதிற்கும் நன்றி தலைவா” எனப் பதிவிட்டுள்ளார்.