நடிப்பில் அசத்தும் வின்சி அலோஷியஸ்!

நல்ல நடிகைகளை தொடர்ந்து அடையாளப்படுத்தி வரும் மலையாள சினிமாவில் தற்போது புதிய வரவாக வந்திருக்கிறார் நடிகை வின்சி அலோஷியஸ்(27).

விக்ருதியில் அறிமுகமான வின்சி, ‘கனகம் காமினி கழகம்’, ‘பீமாவிண்டே வழி’, ‘1744 வயிட் ஆல்டோ’, ‘ரேகா’, ‘பத்மினி’ உள்பட 10க்கும் குறைவான படங்களே நடித்திருக்கிறார். 

ஆனால், ஆச்சரியப்படும் வகையில் இயக்குநர்களின் நாயகியாக கதைக்கு ஏற்ற கதாபாத்திரங்களை தன் நடிப்பால் தத்ரூபமாக திரைக்குக் கடத்தி மாலிவுட் சினிமாவுக்கு நம்பிக்கை நட்சத்திரமாக உருவெடுத்து வருகிறார். 

இதையும் படிக்க: காவாலா பாடலுக்கு நடனமாடிய ஜப்பான் தூதர்!

சாதாரண குடும்பப் பெண்ணாக வரும் காட்சியானாலும் சரி, திடீரென ஆத்திரத்திற்கு உள்ளாகும் வன்முறைப் பெண்ணானலும் சரி எந்த சாயலும் இல்லாத நடிப்பை வினிசியால் வழங்கமுடிகிறது.

நிறத்தைத் தவிர கவர்ச்சி நாயகிகளுக்கு உண்டான எந்த அம்சமும் இல்லாதவர். ஆனால், தான் நடிக்கும் கதாபாத்திரங்களுக்கு எதிர்பார்க்காத அளவிற்கு பாவனைகளின் மூலம் உயிரூட்டி விடுகிறார்.  

இவர் நாயகியாக நடித்த ‘ரேகா’ படத்தின் முதல்பாதிக்கு இரண்டாம் பாதிக்குமான நடிப்பே இவரின் திறனை அடையாளப்படுத்தியுள்ளது. இப்படத்திற்காக 2022 ஆம் ஆண்டின் சிறந்த நடிகைக்கான கேரள அரசின் மாநில விருதை வென்றிருக்கிறார். சமீபத்தில் வெளியான ‘பத்மினி’ படத்திலும் வின்சி தன் நகைச்சுவை உடல்மொழியால் தனித்துத் தெரிகிறார். தேசிய விருது வாங்கினாலும் ஆச்சரியப்பட தேவையில்லை என்கிற நிலையில்தான் ஒவ்வொரு ஃபிரேமிலும் வின்சி நடித்துத்தள்ளிக் கொண்டிருக்கிறார்!  

இதையும் படிக்க: காவாலா பாடலுக்கு நடனமாடிய ஜப்பான் தூதர்!

நட்சத்திர நாயகர்களைச் சுற்றி வட்டமிட்டிருக்கும் இன்றைய கமர்சியல் சினிமாக்களில் கலை என்கிற பேச்சுக்கு துளியும் இடமிருப்பதில்லை. தப்பிப் பிழைக்கும் சில நல்ல படங்களும் பெரும்பாலும் நாயகர்களுக்கோ அல்லது இயக்குநருக்கோ பெயரைப் பெற்றுத் தருகிறது.

ஆனால், அப்படங்களில் இடம்பெறும் துணை நடிகர்கள், துணை நாயகிகள் அடுத்தப்படம் கிடைத்தால் போதும் என்கிற நிலையிலேயே இருக்கிறார்கள். 

மலையாளத்தில் அப்படியான துணை நடிகைகளிலிருந்து மேலேறிய நிமிஷா சஜயன், கிரேஸ் ஆண்டனி ஆகியோர் வரிசையில் வின்சி அலோஷியஸ் இடம்பெற்றிருக்கிறார். அவர்களைவிட நடிப்பாற்றல் மிக்க நாயகியாக வரும் அளவிற்கு திறமையையும் வைத்திருக்கிறார்!