இந்தியன் - 2 எதிர்பார்ப்பை விட அதிகமாக இருக்கும்: சித்தார்த்

இந்தியன் 2  ரசிகர்களின் எதிர்பார்ப்பை விட அதிகம் பூர்த்தி செய்யும் படமாக இருக்கும் என நடிகர் சித்தார்த் தெரிவித்துள்ளார்.

இயக்குநர் ஷங்கர் இயக்கத்தில் கமல்ஹாசன் நடித்துவந்த இந்தியன் 2 படம் விபத்து உள்ளிட்ட காரணங்களால் பாதியில் நின்றது. கமலின் ‘விக்ரம்’ மிகப்பெரிய வெற்றியைப் பெற்றதால் தற்போது ‘இந்தியன் 2’ படத்தை மீண்டும் தொடங்கியுள்ளனர். 

ஜெயமோகன் எழுத்தில் லைகா தயாரிப்பில் அனிருத் இசையில் ரவி வர்மா, ரத்னவேலு ஒளிப்பதிவில் உருவாகும் இந்தியன் 2 படத்தில் கமலுடன் இணைந்து சமுத்திரக்கனி, பாபி சிம்கா, காஜல் அகர்வால், சித்தார்த், ராகுல் பிரீத் சிங், பிரியா பவானி சங்கர் உள்ளிட்ட பலர் நடிக்கின்றனர். 

இதையும் படிக்க: ரஜினிக்கு வில்லனாகும் அர்ஜுன்?

இப்படத்தின் சமீப படப்பிடிப்பு தென் ஆப்பிரிக்காவில் மிகப்பிரம்மாண்டமாக எடுக்கப்பட்டது. அதன்பின், ஷங்கர் ராம் சரணை வைத்து இயக்கும் ‘கேம் சேஞ்சர்’ படப்பிடிப்புக்கு சென்றார்.

தற்போது,  இந்தியன் 2  படத்தின் இறுதிக்கட்ட படப்பிடிப்பு நடந்து வருகிறது. இந்நிலையில், நடிகர் சித்தார்த், ‘என் குரு கமல்ஹாசனுடன் இணைந்து நடித்ததை வாழ்நாள் வாய்ப்பாக நினைக்கிறேன். இந்தியன் 2 திரைப்படம் ரசிகர்களின் எதிர்பார்ப்பைவிட 10 மடங்கு அதிக பூர்த்தியைத் தரும்’ எனத் தெரிவித்துள்ளார்.