லால் சலாம் படத்தில் நடிகர் ரஜினிகாந்த் சிறப்பு தோற்றத்தில் நடிக்கவுள்ள பெயர் மற்றும் தோற்றம் அடங்கிய போஸ்டர் வெளியாகியுள்ளது.
லைகா தயாரிப்பில் ஐஸ்வர்யா ரஜினிகாந்த் இயக்கத்தில் உருவாகி வரும் படம் லால் சலாம். விஷ்ணு விஷால், விக்ராந்த் இணைந்து நடிக்கும் இப்படத்திற்கு ஏ.ஆர்.ரகுமான் இசையமைக்கிறார்.
லால் சலாம் படத்தின் முதல்கட்ட படபிடிப்பு திருவண்ணாமலையில் முடிவடைந்த நிலையில், தற்போது மும்பையில் ரஜினி நடிக்கவுள்ள காட்சிகள் படமாக்கப்பட்டு வருகின்றன. சுமார் 20 நிமிடங்கள் இப்படத்தில் ரஜினியின் காட்சிகள் இடம்பெறும் என்று தகவல்கள் வெளியாகியுள்ளன.
இந்நிலையில், படத்தில் ரஜினி நடிக்கவுள்ள தோற்றம் மற்றும் பெயரை தயாரிப்பு நிறுவனம் இன்று போஸ்டராக வெளியிட்டுள்ளது.
மொய்தீன் பாய் என்ற கதாபாத்திரத்தில் நடிக்கவுள்ளதாக தெரிவிக்கப்பட்டுள்ளது. மேலும், இஸ்லாமிய தோற்றத்தில் இருக்கும் புகைப்படத்தையும் வெளியிட்டுள்ளனர்.
இந்த புகைப்படத்தை ரஜினியின் ரசிகர்கள் இணையத்தில் பகிர்ந்து வைரலாக்கி வருகின்றனர்.