சினிமா நடிகை அனுபமாவைப்போல் மாறிய சின்னத்திரை நடிகை!

நடிகை அனுபமா பரமேஸ்வரனின் தோற்றத்தைப்போன்று மாறிய சின்னத்திரை நடிகை செளந்தர்யா ரெட்டியின் விடியோவை ரசிகர்கள் பலர் பகிர்ந்து வருகின்றனர்.

'டில்லு ஸ்கொயர்' என்ற தெலுங்கு படத்தில் இடம்பெற்றுள்ள 'ராதிகா..' என்ற பாடல் இணையத்தில் டிரெண்டாகி வருகிறது. இந்தப் பாடலில் நடிகை அனுபமா பரமேஸ்வரன் சுருள் முடியுடன் நடனமாடுவது வைரலாகி வருகிறது. (இயல்பிலேயே சுருள்முடியுடையவர் நடிகை அனுபமா)

அனுபமாவின் தோற்றத்தைப்போன்று சுருள் முடியுடன் நடிகை செளந்தர்யா விடியோ வெளியிட்டுள்ளார். இந்த விடியோவுடன் ராதிகா என்ற பாடலையும் இணைத்துள்ளதால், பலர் இதில் கருத்துகளைப் பதிவிட்டு வருகின்றனர்.

ஒரு சாதாரண விடியோவுக்காக, ஒப்பனை செய்து, இவ்வளவு சிரமம் எடுத்துக்கொண்ட செளந்தர்யாவின் முயற்சியை பலர் பாராட்டினாலும், அனுபமாவின் ரசிகர்கள் சிலர் விமர்சித்து கருத்துகளைப் பதிவிட்டுள்ளனர்.

ஜீ தமிழ் தொலைக்காட்சியில் ஒளிபரப்பாகிவரும் மீனாட்சி பொண்ணுங்க தொடரில் நாயகியாக நடிப்பவர் நடிகை செளந்தர்யா ரெட்டி. இவர் தெலுங்கில் முன்னணி தொடர்களில்ல் நாயகியாக நடித்தவர். கன்னட மொழித் தொடரிலும் நாயகியாக நடித்துள்ளார்.

தற்போது 'மீனாட்சி பொண்ணுங்க' தொடரின் மூலம் தமிழில் அறிமுகமாகியுள்ளார். அந்தத் தொடரில் நடித்ததற்காக சிறந்த நடிகைக்கான விருதையும் செளந்தர்யா வென்றுள்ளார் என்பது குறிப்பிடத்தக்கது.