கார்த்திகை தீபம் ஆர்த்திகாவின் புதிய தொடர்! ஜோடி யார் தெரியுமா?

கார்த்திகை தீபம் தொடரில் நாயகியாக நடித்த நடிகை ஆர்த்திகா புதிய தொடரில் ஒப்பந்தமாகியுள்ளார்.

தெய்வமகள், சுந்தரி உள்ளிட்டத் தொடரில் நாயகனாக நடித்து புகழ் பெற்ற நடிகர் கிருஷ்ணா, ஆர்த்திகாவுக்கு ஜோடியாக நடிக்கவுள்ளார். இத்தொடருக்கு வினோதினி எனப் பெயரிடப்பட்டுள்ளது.

ஜீ தமிழ் தொலைக்காட்சியில் ஒளிபரப்பான கார்த்திகை தீபம் தொடரில் பலதரப்பட்ட ரசிகர்களைக் கவர்ந்த ஆர்த்திகா, சிறிய இடைவேளைக்குப் பிறகு இத்தொடரில் நாயகியாக நடிக்கிறார். இதற்கு முன்பு பிளாக் & ஒயிட் என்ற இணையத் தொடரில் கார்த்திக் உடன் சேர்ந்து நடித்திருந்தார்.

இந்தத் தொடரின் வினோதினி என்ற பெயரிலேயே நடிப்பதாகவும், வாழ்வில் போராடி வெற்றி பெறும் பெண்ணின் பாத்திரத்தை ஏற்று நடிக்கவுள்ளதாகவும் கூறப்படுகிறது.

சமூகத்தில் பெண்களின் வளர்ச்சிக்குத் தடையாக இருக்கும் காரணிகளை எவ்வாறு எதிர்கொண்டு பொருளாதார சுதந்திரம் பெறுகிறாள் வினோதினி என்ற அடிப்படையில் இத்தொடரின் கதைக்களம் அமைக்கப்பட்டுள்ளது.

பொழுதுபோக்குடன் பெண்களை மேம்படுத்தும் வகையிலான கருத்துகளையும் கூறும் வகையில் வினோதினி தொடர் ஒளிபரப்பாகவுள்ளது. மேலும், திரைப்படங்களிலும் தொடர்களிலும் பல்வேறு வேடங்களில் நடித்த கிருஷ்ணா, இத்தொடரில் வினோதினியை ஊக்குவிக்கும் ஆண் பாத்திரத்தில் நடிப்பார் என எதிர்பார்க்கப்படுகிறது.

இத்தொடரில் நடிக்கவுள்ள மற்ற நடிகைகள், நடிகர்கள் குறித்த தகவல்கள் இன்னும் அதிகாரப்பூர்வமாக வெளியாகவில்லை.

இளம் நடிகையாக இருந்தும் முதிர்ச்சியான பாத்திரங்களைத் தேர்வு செய்து ஆர்த்திகா நடித்து வருவதால், இத்தொடரின் மீதான எதிர்பார்ப்பு அதிகரித்துள்ளது.

இதையும் படிக்க | கணவரின் இன்ப அதிர்ச்சிக்காக காத்திருந்த நடிகை மணிமேகலை!