இயக்குநர் பாரதிராஜாவின் நிலைமை என்ன?

இயக்குநரும் நடிகருமான பாரதிராஜா உடல்நிலை குறித்து தகவல் வெளியாகியுள்ளது.

இயக்குநர் பாரதிராஜா சில நாள்களுக்கு முன் மூச்சுத்திணறல் காரணமாக, சென்னையில் உள்ள தனியார் மருத்துவமனையில் அனுமதிக்கப்பட்டார்.

தீவிர சிகிச்சைப் பிரிவில் (ICU) வைத்து அவருக்கு உரிய மருத்துவ சிகிச்சைகள் அளிக்கப்பட்டு வந்தன. அப்போதே, பல திரைப்பிரபலங்கள் நேரில் சென்று நலனை விசாரித்தனர்.

தொடர்ந்து, அவரது உடல்நிலை சீராக உள்ளதாகவும், மருத்துவ நிபுணர்கள் குழுவினரால் அவர், தொடர்ந்து கண்காணிக்கப்பட்டு வருவதாகவும் மருத்துவமனை நிர்வாகம் கூறியது.

இந்த நிலையில், ஓரிரு நாள்களுக்கு முன் மருத்துவமனையிலிருக்கும் பாரதிராஜாவின் உடலும் முகமும் நலிவுற்ற புகைப்படம் வெளியாகி பலருக்கும் அதிர்ச்சியைக் கொடுத்தது. இதனால், அவர் ஆபத்தான நிலையில் இருப்பதாக பலரும் வருந்தினர்.

தற்போது, தயாரிப்பாளர் ஜேஎஸ்கே சதீஷ்குமார் பதிவொன்றை வெளியிட்டுள்ளார். அதில், “இயக்குநர் பாரதிராஜா கடும் போராட்டத்திற்குப் பின் குணமடைந்துள்ளார். எப்போதும் தன்னம்பிக்கைதான் வெல்லும். ஆரோக்கியத்துடனும் மகிழ்ச்சியுடனும் நீங்கள் 100 ஆண்டுகள் வரை வாழ கடவுள் ஆசிர்வதிக்கட்டும்” எனக் கூறியுள்ளார். இப்பதிவால், பாரதிராஜா நலமடைந்த செய்த ரசிகர்களிடம் மகிழ்ச்சியை ஏற்படுத்தியுள்ளது.