அஞ்சலி பாட்டீலின் செல்வி..! பூசன் திரைப்பட விழாவில் தேர்வான தமிழ்ப் படம்!

தமிழ்நாட்டைச் சேர்ந்த சைலேஷ் ரத்னகுமார் இயக்கிய செல்வி திரைப்படம் பூசன் திரைப்பட விழாவில் திரையிட தேர்வாகியுள்ளது.

இந்தப் படத்தில் நாயகியாக அஞ்சலி பாட்டீல் நடித்துள்ளார். மேலும் இவரே இந்தப் படத்தினை தயாரித்திருப்பதும் குறிப்பிடத்தக்கது.

நடிகர் ரஜினியின் காலா படத்தில் நடித்து கவனம் பெற்றவர் நடிகை அஞ்சலி பாட்டீல். ஹிந்தி படங்களில் நடித்து வருகிறார். தேசிய விருது வென்ற இவர் பல வித்தியாசமான படங்களில் நடித்து வருகிறார்.

தென் கொரியாவில் நடக்கும் பூசன் திரைப்பட விழாவில் வரும் அக்.6ஆம் தேதி இந்தப் படம் ஆசிய பிரிவில் திரையிடப்பட விருப்பதாக அறிவிக்கப்பட்டுள்ளது.

இந்தப் படம் புலம்பெயர்ந்த செவிலியர்கள் படும் கஷ்டத்தை அடிப்படையாகக் கொண்டு உருவாக்கப்பட்டுள்ளது. ஒளிப்பதிவாளர் பார்கவ் ஸ்ரீதர் உடன் இணைந்து இந்தப் படத்தின் கதையை உருவாக்கியுள்ளார் இயக்குநர் சைலேஷ் ரத்னகுமார்.

சைலேஷ் ரத்னகுமார் கோயம்புத்தூரில் இருந்து சென்னைக்கு புலம்பெயர்ந்துள்ளார். செல்வி என்ற செவிலியரின் வாழ்க்கையை படமாக எடுத்துள்ளார். இதில் நாயகியாக அஞ்சலி பாட்டீல் அசத்தியுள்ளார்.