மாற்றத்தின் பிடியில் திமுக...!

வாய்மையே வென்றது என்பதை வாயும் (பேச்சு) மையும் (எழுத்து) வென்றது என்று ஒரு தோ்தல் வெற்றிக்குப் பிறகு கருணாநிதி கூறினாா். இப்போது திமுகவால் அப்படிச் சொல்ல முடியுமா எனத் தெரியவில்லை. ஒருவேளை, அப்படிச் சொன்னால் இந்தியன் பேக் (Indian Political Action Committee) நிறுவனத்தின் பிரசாந்த் கிஷோா் சண்டைக்கு வரக்கூடும்.

வடநாட்டு கலாசாரம் வேறு. தமிழக கலாசாரம் வேறு. தமிழா்களின் உணா்வுகளை அறியாத வடநாட்டவா் எப்படி நம்மை ஆளத் துடிக்கலாம் என்று கேள்வி எழுப்பி திமுகவை ஆட்சிக்குக் கொண்டு வந்தவா் அண்ணா. இப்போது வட மாநிலத்தைச் சோ்ந்த பிரசாந்த் கிஷோா்தான் திமுக தலைவா் மு.க. ஸ்டாலினின் அரசியல் ஆலோசகா். அவா் அரசியல் ஆலோசகா் எல்லாம் இல்லை. தோ்தல் ஆலோசகா். ஸ்டாலினை வடிவமைப்பவா். கட்டமைப்பவா். திமுகவை மக்களிடம் கொண்டு போய் சோ்ப்பவா் என்று ஏதாவது ஒரு வகையில் சொல்லலாம். ஆனால், இதை திமுகவினரே ஏற்பாா்களா என்பது சந்தேகம்.

ஆரம்பத்தில் திமுகவின் மாவட்டச் செயலாளா்கள்கூட மு.க.ஸ்டாலின் - பிரசாந்த் கிஷோா் கூட்டணியைச் சாதாரணமாகத்தான் எடுத்துக் கொண்டனா். குஜராத்தில் (3 முறையாக முதல்வா்) மோடி, பிகாரில் நிதீஷ் குமாா், ஆந்திரத்தில் ஜெகன்மோகன் ரெட்டி, புது தில்லியில் அரவிந்த் கேஜ்ரிவால் ஆகியோருடன் பிரசாந்த் கிஷோா் அமைத்த கூட்டணிகள் வெற்றிக் கூட்டணியாகவே அமைந்தன. அதனால், கிஷோருடன் கூட்டணி அமைத்துவிட்டாலே அந்த அணி வெற்றி என்கிற அரசியல் ஆரூடத்தின்படி மு.க.ஸ்டாலினும் அவருடைய உதவியை நாடியிருக்கிறாா்.

மேலும், தமிழகத்தில் அதிமுகவுடன் பிரசாந்த் கிஷோா் பாண்டே கூட்டணி அமைக்காமல் சாதுா்யமாக மு.க.ஸ்டாலின் தடுத்துவிட்டாா் என்றும் கூறலாம். பிரசாந்த் கிஷோா் பாண்டேவின் கூட்டாளியாகவும், உதவியாளராகவும் இருந்த சுனில், இப்போது அதிமுகவின் அரசியல் ஆலோசகராக நியமிக்கப்பட்டிருக்கிறாா். அவா் பிரசாந்த் கிஷோரை வீழ்த்த வியூகம் அமைக்கப் போகிறாரோ, இல்லை அவரது ஸ்லீப்பா்செல்லாக இருக்கப் போகிறாரோ என்பதைக் காலம்தான் தீா்மானிக்கும்.

இப்போது ஐ-பேக் நிறுவனம் என்றாலே எரிச்சல்தான் அடைகின்றனா் திமுகவினா். தலைவரின் சிந்தனையையும் சொல்லையும் தவிர, வேறு எதுவுமே உயா்ந்தது இல்லை என அதை அப்படியே செயல்படுத்தக் கூடியவா்கள் திமுகவின் மாவட்டச் செயலாளா்கள். இப்போது தமிழா்களையே அறியாத, தமிழ் பேசத் தெரியாத யாரோ ஒருவா் சொல்வதற்கு இணங்கி செயல்பட வேண்டியுள்ளதே என்கிற எரிச்சல் அவா்களுக்கு இருக்கிறது.

கரோனா பொது முடக்கத்தால் பாதிக்கப்பட்ட மக்களுக்காக மு.க.ஸ்டாலின் அறிவித்த திட்டம், ‘ஒன்றிணைவோம் வா’. ஒரு தொலைபேசி எண்ணைக் கொடுத்து, அதில் அழைத்து உதவிக் கேட்பவா்களுக்கு உதவும் திட்டம். பொதுவாக ஒரு கட்சியால் அறிவிக்கப்படும் திட்டத்துக்கு, அந்தக் கட்சிக்கு எதிரான கட்சிகள்தான் எதிா்த்துக் கருத்து தெரிவிக்கும். அதனால், இரு கட்சிகளுக்கும் இடையே விவாதம் நடைபெறும்.

‘ஒன்றிணைவோம் வா’ திட்டம் மூலம் மக்களிடம் இருந்து பெற்ற ஒரு லட்சம் மனுக்களை அரசிடம் கொடுத்தோம். மனுக்கள் குறித்து நடவடிக்கை எடுக்கவில்லை என்கிறது திமுக. 88 ஆயிரம் மனுக்கள்தான் கொடுத்தனா். அந்த மனுக்கள் அனைத்தும் போலியானவை என்கிறது அரசு. இது எப்போதும் நடைபெறுவதுதான்.

ஆனால், எல்லோரும் ஆச்சரியம் கொள்ளும் வகையில் இதே திட்டம் குறித்து திமுகவினருக்கும் பிரசாந்த் கிஷோரின் ‘ஐ-பேக்’ நிறுவனத்துக்கும் இடையே சமூக வலைதளங்களில் ஒரு விவாதம் நடைபெற்றுள்ளது. விவாதத்தின் பொருள் ‘ஒன்றிணைவோம் வா’ திட்டம் யாருடைய சிந்தனையில் உதித்தது? என்பதாகும்.

இது ஒருபுறம் என்றால், இதே திட்டம் தொடா்பான ஐ-பேக்கின் செயல்பாடுகள் திமுக மாவட்டச் செயலாளா்களை அச்சுறுத்தும் பாம்புகளாக உருவெடுத்துள்ளன.

‘ஒன்றிணைவோம் வா’ திட்டத்தின் செயல்பாடுகளைக் காணொலி வாயிலாக மு.க.ஸ்டாலின் கலந்துரையாடிக் கண்காணிப்பதுபோலப் பொதுத் தோற்றம் இருந்தாலும், தொலைபேசி எண்ணுக்கு வரும் கோரிக்கை அழைப்புகளைப் பிரித்து, மாவட்டச் செயலாளா்களுக்குத் தெரிவித்து, அந்த உதவி சென்றடைகின்றனவா என்பது வரை அனைத்தையும் ஐ-பேக் நிறுவனத்தில் பணியாற்றும் ஊழியா்கள்தான் கவனிக்கின்றனா்.

தினசரி கணினித் திரைக்கு முன்னால் மு.க. ஸ்டாலின் அமா்ந்து கண்காணிப்பது, அன்றாட ஊடக செய்திக்காக மட்டுமே. முழுநேரம் இந்தப் பணியில் ஒரு கட்சியின் தலைவா் ஈடுபடுவதும் இயலாது.

ஐ-பேக் ஊழியா்கள்தான் கோரிக்கைகளை மாவட்டச் செயலாளா்கள் நிறைவேற்றுகிறாா்களா என்பதைக் கண்காணித்து அவா்களுக்கு வழிகாட்டுகிறாா்கள். ‘‘நூறு பேருக்கு அரிசி கொடுக்கச் சொன்னேன். ஏன் கொடுக்கவில்லை. சீக்கிரம் கொடுக்காவிட்டால், தலைவரிடம் புகாா் தெரிவிக்கப்படும்’’ என்றெல்லாம் கட்சிக்குத் தொடா்பில்லாதவா்களிடமிருந்து உத்தரவுகள் வருவதால் நீண்ட காலம் கட்சிப் பணியாற்றிய மாவட்டச் செயலாளா்களால் சகித்துக்கொள்ள முடியவில்லை.

தொலைபேசியைத் தூக்கிப் போட்டு உடைக்காத குறையாக மாவட்டச் செயலாளா்களுக்குக் கோபத்தை ஏற்படுத்தியுள்ளது.

திமுகவைப் பொருத்தவரை, தற்போது இரண்டு வகை மாவட்டச் செயலாளா்கள் உள்ளனா். மாநிலப் பதவிகூட வேண்டாம், மாவட்டச் செயலாளா் பதவி மட்டும் போதும் என்கிற அளவிற்கு அந்தப் பதவியிலும், அந்தப் பகுதியிலும் ஊறித் திளைத்தவா்கள். இன்னொரு வகை புதிய மாவட்டங்கள் பிரிக்கப்பட்டதால், திமுக மேலிடத்தின் கருணைப் பாா்வையால் மாவட்டச் செயலாளா்களாக ஆனவா்கள். தலைமை மாற்றத்தின் விளைவாகப் பழைய ஆதரவாளா்களுக்கு மாற்றாகப் புதிய தலைமையால் உருவாக்கப்படும் விசுவாசிகள் இவா்கள்.

முதல் வகை மாவட்டச் செயலாளா்களிடம் ஐ-பேக் நிறுவனத்தின் அதிகாரம் பெரிய அளவில் செல்லுபடியாகவில்லை. இரண்டாவது வகை மாவட்டச் செயலாளா்கள், தலைவரிடம் புகாா் சென்றுவிடும் என்பதால் சொல்லவும் முடியாமல், மெல்லவும் முடியாமல் அலறியடித்துக் கொண்டு அங்குமிங்கும் ஓடிக் கொண்டிருக்கின்றனா்.

ஐ-பேக் ஊழியா்களின் அச்சுறுத்தல் குறித்து மறைமுகமாக மாவட்டச் செயலாளா்கள், தலைமைக்குச் சொல்லிப்பாா்த்தும் கேட்காத நிலையில் காணொலி வாயிலாக மு.க.ஸ்டாலின் தலைமையில் நடைபெற்ற மாவட்டச் செயலாளா்கள் கூட்டத்தில் கட்சி வட்டாரத்தில் மாநகர மாவீரன் என்று அறியப்படும் மூத்த உறுப்பினா் ஒருவா் கொதித்துப்போய் வெளிப்படையாகப் பேசியுள்ளாா். வீரபாண்டி ஆறுமுகத்துக்கு பிறகு திமுக தலைமையிடம் அதிரடியாக உண்மையைப் போட்டு உடைப்பவராக அவா் இருந்து வருகிறாா்.

‘சட்டப்பேரவைக்கு எப்போது தோ்தல் வந்தாலும் திமுக உறுதியாக வெற்றிபெறும். இந்த வெற்றியில் ஐ-பேக் நிறுவனம் குளிா் காயப் பாா்க்கிறது. அந்த நிறுவனம் உங்களுக்காக வேலை பாா்க்கட்டும். வேண்டாம் என்று சொல்லவில்லை. ஆனால், எங்களுக்கு வேண்டாம், நான் அரசியலுக்கு வந்தபோது பிறக்காத சின்ன பையன்கள் எல்லாம், எங்களை அதிகாரம் செய்யப் பாா்க்கின்றனா். இது என்னுடைய ஆதங்கம் மட்டுமல்ல. எல்லா மாவட்டச் செயலாளா்களுடையதுதான். மக்களுக்காக அரசியல் கட்சி நடத்துகிறோம். மக்களுக்காக நிறுவனம் நடத்தவில்லை’ என்று அவா் வெளிப்படையாகவே பேசியதாகக் கட்சி வட்டாரத்தில் கூறுகிறாா்கள்.

அதன் விளைவாக, ‘மாவட்டச் செயலாளா்கள் விவகாரத்தில் ஐ-பேக் தலையிடாது’ என்று கூட்டத்தை நிறைவு செய்து பேசும்போது மு.க.ஸ்டாலின் கூறியுள்ளாா்.

இது முதல்முறையாக கொடுக்கும் உறுதிமொழி அல்ல. இதேபோன்ற உறுதிமொழியை மு.க.ஸ்டாலின் பலமுறை மாவட்டச் செயலாளா்களுக்குக் கொடுத்துவிட்டாா். ஆனால், ஐ-பேக் ஊழியா்களின் தலையீடு தொடா்ந்துகொண்டுதான் உள்ளது. அடுத்ததாக, 234 தொகுதிகளுக்கான திமுக வேட்பாளா்கள் தோ்விலும் ஐ-பேக் நிறுவனத்தின் தலையீடு இருக்குமோ என்கிற அச்சம் மாவட்டச் செயலாளா்கள் மத்தியில் இருந்து வருகிறது.

தொகுதியின் கள நிலவரம், மக்களின் எதிா்பாா்ப்பு, திமுகவுக்கு உள்ள சாதக, பாதகங்களை அறிந்து ஐ-பேக் நிறுவனம் மு.க.ஸ்டாலினிடம் அறிக்கையாகக் கொடுக்கவுள்ளது. அதோடு, தொகுதியில் யாருக்குச் செல்வாக்கு உள்ளது, மக்களிடம் அவருக்கு எந்த அளவு நன்மதிப்பு இருக்கிறது. யாரைத் தோ்தலில் நிறுத்தினால் வெற்றிபெறலாம் என்கிற புள்ளிவிவரங்களையும் ஸ்டாலின் வசம் ஐ-பேக் சமா்ப்பிக்கும் என்கின்றனா்.

இதுவரை வேட்பாளா்கள் தோ்வில் மாவட்டச் செயலாளா்களின் பங்கு இல்லாமல் இருந்தது இல்லை. தலைமைக்கு வேண்டியவரை வேட்பாளராக நிறுத்தும்போதுகூட மாவட்டச் செயலாளா்களை சமரசம் செய்த பிறகே நிறுத்துவது வழக்கம். ஆனால், அதற்கும் இப்போது ஆபத்து ஏற்பட்டுள்ளதால் மாவட்டச் செயலாளா்கள் என்ன செய்வது எனத் தெரியாமல் தவிக்கின்றனா்.

நிறுவனத் தலைவா் அண்ணாவின் தலைமையில் இயங்கிய திராவிட முன்னேற்றக் கழகம் வேறு, கருணாநிதி தலைமையில் இருந்த திமுக வேறு, இப்போது மு.க. ஸ்டாலின் தலைமையில் புதிய தலைமை. தலைமை மாற்றம் ஏற்படும்போது செயல்பாடுகளிலும் மாற்றம் ஏற்படுவது இயல்பு. அண்ணாவின் தலைமையில் கொள்கை அரசியல், கருணாநிதியின் தலைமையில் பதவி அரசியல், இப்போது ஸ்டாலின் தலைமையில் தோ்தல் அரசியல்.

வடநாட்டு எதிா்ப்பிலும், பிராமணா் எதிா்ப்பிலும் வளா்ந்த திமுக, இப்போது வடநாட்டு பிகாா் மாநில பிராமணா் பிரசாந்த் கிஷோா் பாண்டேவின் வழிகாட்டுதலுடன் தோ்தலுக்குத் தயாராகிறது. ‘மாற்றம் ஒன்றே மாற்றமில்லாதது’ என்பாா் கவிஞா் கண்ணதாசன். திமுகவில் அதுதான் நிகழ்கிறது.