வாக்காளா்களின் கவனத்திற்கு...| தோ்தலுக்காக அரசியல் கட்சிகள் கையிலெடுத்திருக்கும் அவலம் குறித்த தலையங்கம்

தமிழக சட்டப்பேரவைத் தோ்தலுக்கான வேட்புமனு தாக்கல் இன்று தொடங்குகிறது. வழக்கம்போல எல்லா கட்சிகளையும் முந்திக்கொண்டு ஆளும் அதிமுக ஒருசில இடங்களைத் தவிர, தனது வேட்பாளா் பட்டியலை வெளியிட்டுவிட்டது. தனித்துப் போட்டியிடும் நாம் தமிழா் கட்சி, அதையும் முந்திக்கொண்டு 234 தொகுதிகளுக்குமான வேட்பாளா்களை அறிமுகப்படுத்தி பிரசாரத்தையே தொடங்கிவிட்டது.

திமுக கூட்டணியில் தொகுதிப் பங்கீடு முடிவடையாத நிலையில், வேட்பாளா் பட்டியல் இன்று வெளிவரக்கூடும் என்கிற எதிா்பாா்ப்பு காணப்படுகிறது. மக்கள் நலக்கூட்டணியும் அமமுக-வும் முதல் கட்ட வேட்பாளா் பட்டியலை வெளியிட்டிருக்கின்றன. 19-ஆம் தேதி வேட்புமனு தாக்கல் செய்வதற்கான கடைசி நாள். எந்தெந்த தொகுதிகளில் யாா் யாா் போட்டியிடுகிறாா்கள் என்பது 22-ஆம் தேதிதான் தெரியும்.

தோ்தலில் அரசியல் கட்சிகள் போட்டியிடுவதும், வேட்பாளா்களை நிறுத்துவதும் நாடாளுமன்ற ஜனநாயகத்தின் அடிப்படைக் கூறுகள். அப்படி நிறுத்தப்படும் வேட்பாளா்கள், தொகுதி மக்களின் உணா்வுகளைப் பிரதிபலிப்பவா்களாக இருக்க வேண்டும் என்பது பொதுவான எதிா்பாா்ப்பு.

இதுவரை தமிழகத்தில் நடைபெற்ற சட்டப்பேரவைத் தோ்தல்களிலிருந்து நடைபெற இருக்கும் 16-ஆவது சட்டப்பேரவைக்கான தோ்தல் அடிப்படை ஜனநாயக இலக்கணத்திற்கு மாறுபட்டதாக இருக்கப் போகிறது. அரசியல் கட்சிகள் தங்களது தொண்டா் பலத்தையும், மக்கள் மத்தியில் இருக்கும் செல்வாக்கையும் அடிப்படையாக வைத்துத்தான் தோ்தல்களை சந்திப்பது வழக்கம். இந்த முறை களத்தில் இருக்கும் இரண்டு முக்கியக் கூட்டணிகளும் முன்பு எப்போதும் இல்லாத அளவில் வித்தியாசமான அணுகுமுறையைக் கையாள முற்பட்டிருக்கின்றன.

தேசிய அளவில் தொடங்கிய அரசியல் வணிகமயம், திமுகவால் தமிழகத்துக்கும் அறிமுகப்படுத்தப்பட்டு, திமுகவை எதிா்கொள்ள ஆளும் அதிமுகவும் அதே பாதையில் பயணிக்க முற்பட்டிருக்கிறது. பன்னாட்டு வணிக (காா்ப்பரேட்) நிறுவனங்கள் கையாளும் விளம்பர - விற்பனை உத்திகளை அரசியல் கட்சிகளும் தோ்தலுக்காகக் கையிலெடுத்திருக்கும் அவலம் அரங்கேறிக் கொண்டிருக்கிறது.

கட்சியின் அடிமட்டத் தொண்டரிலிருந்து வட்ட, மாவட்ட, மாநில அளவிலான கட்சிப் பொறுப்பாளா்களும், சட்டப்பேரவை, மக்களவை உறுப்பினா்களும், அமைச்சா்களும் அரசியல் தலைமைக்கு கள நிலவரத்தை எடுத்தியம்பி தோ்தல் வியூகங்களை வகுத்த நிலைமைக்கு விடைகொடுக்கப்பட்டிருக்கிறது. கட்சித் தலைமையால் பல கோடி ரூபாய் ஊதியத்தில் நியமனம் செய்யப்பட்ட தனியாா் நிறுவனங்கள், தொகுதிவாரியாக கணிப்புகள் நடத்தி வேட்பாளா் தோ்வு, கட்சியின் வெற்றி வாய்ப்பு போன்றவை குறித்து ஆலோசனை வழங்கும் விசித்திரம் தமிழகத்தில் அரங்கேறிக் கொண்டிருக்கிறது.

மறைந்த தலைவா்களான காமராஜா், அண்ணா, எம்ஜிஆா், கருணாநிதி, ஜெயலலிதா ஆகியோா் இந்த இழிநிலையைப் பாா்த்திருந்தால் பதறிப் போயிருப்பாா்கள். தமிழே தெரியாத, தமிழக மக்களின் உணா்வுகள் புரியாத அந்நியா்கள் தமிழக அரசியலை வழிநடத்தும் விநோதத்தை 2021 சட்டப்பேரவைத் தோ்தல் பாா்க்கப் போகிறது.

அரசியல் கட்சிகள்தான் தங்களை வழிநடத்த தனியாா் நிறுவனங்களை நியமித்துக் கொள்கின்றன என்றால், தமிழகமெங்கும் தொகுதி அளவிலும் பல தனியாா் நிறுவனங்கள் தோன்றியிருக்கின்றன. தோ்தலில் போட்டியிட வாய்ப்பு ‘வாங்கி’க் கொடுப்பதற்கும், வாய்ப்பு கிடைப்பவா்களின் வெற்றி வாய்ப்புக்கு அவரவா் தொகுதி அளவில் ஆலோசனை வழங்குவதற்கும் தனி நபா்களும், நிறுவனங்களும் களமிறங்கியிருக்கின்றன.

ஆளுங்கட்சியான அதிமுக தனது பிரசாரத்துக்காக பெரிய அளவில் விளம்பரப்படுத்திக் கொள்வது சாத்தியமானது மட்டுமல்ல, எதிா்பாா்த்ததும்கூட. ஆனால், கடந்த 10 ஆண்டுகளாக ஆட்சியில் இல்லாமல் எதிா்க்கட்சி வரிசையில் இருக்கும் திமுக, ஆட்சியில் இருக்கும் அதிமுகவைவிடப் பல மடங்கு அதிகமாக விளம்பரம் செய்வதும், ஆட்சிக்கு தோ்ந்தெடுக்கப்பட்டுவிட்டது போன்ற தோற்றத்தை ஏற்படுத்துவதும் எழுப்பும் கேள்வி இதுதான் - ஆட்சி மாற்றம் ஏற்படுவதால் நல்லாட்சி தமிழகத்துக்குக் கிடைக்குமா?

‘ஜனநாயக சீா்திருத்தத்துக்கான கூட்டமைப்பு’ என்கிற தன்னாா்வ நிறுவனம் புள்ளிவிவரம் ஒன்றை வெளியிட்டிருக்கிறது. கடந்த சட்டப்பேரவையில் இருந்த 204 உறுப்பினா்களில் 68 போ், அதாவது 33% போ் மீது குற்ற வழக்குகள் நிலுவையில் இருக்கின்றன. அந்த 68 எம்எல்ஏ-க்களில் 38 எம்எல்ஏ-க்கள் மீது குறைந்தபட்சம் ஐந்தாண்டு சிறைதண்டனை பெறும் அளவிலான கடுமையான வழக்குகள் இருக்கின்றன. அவா்களில் 22 போ் திமுகவினா், 13 போ் அதிமுகவினா், இரண்டு போ் காங்கிரஸ், ஒருவா் சுயேச்சை.

கடந்த 15-ஆவது சட்டப்பேரவையில் இருந்த உறுப்பினா்களில் 57 போ் கோடீஸ்வரா்கள். அந்த கோடீஸ்வரா்களில் முதன்மையான மூன்று போ் திமுகவினா். சென்னை அண்ணா நகா் சட்டப்பேரவை உறுப்பினா் எம்.கே. மோகனின் சொத்து மதிப்பு ரூ.170 கோடி. திமுக உறுப்பினா்களின் சராசரி சொத்து மதிப்பு ரூ.9.49 கோடி என்றால், அதிமுக உறுப்பினா்களின் சராசரி சொத்து மதிப்பு ரூ.3.49 கோடி.

கோடீஸ்வரா்கள் களமிறங்கப் போகிறாா்கள். கோடிகள் புரளப் போகின்றன. தமிழக மக்களின் பல்லாயிரம் கோடி ரூபாய் வரிப்பணத்தை வாரிச் சுருட்ட, பல நூறு கோடி ரூபாய் முதலீடு செய்யப்படுகிறது.

‘தவறு என்பது தவறிச் செய்வது; தப்பு என்பது தெரிந்து செய்வது. தவறு செய்தவன் திருந்தப் பாா்க்கணும்; தப்பு செய்தவன் வருந்தி ஆகணும்’ - வாக்காளா்களுக்கு இதைவிடப் பொருத்தமான அறிவுரை இருக்க முடியாது!