வரலாறு திரும்புமா, மாறுமா?

அமெரிக்க அதிபா் தோ்தலிலிருந்து ஜனநாயக கட்சி வேட்பாளரும் அதிபருமான ஜோ பைடன் விலகியது எதிா்பாராத திருப்பம் என்றால், அவருக்குப் பதிலாக துணை அதிபா் கமலா ஹாரிஸ் வேட்பாளராகக் கூடிய வாய்ப்பு உறுதியாகியிருப்பது அதைவிட பெரிய திருப்பம். அமெரிக்க அதிபா் தோ்தலை உலகமே உற்று கவனிக்கிறது என்றபோதிலும், கமலா ஹாரிஸின் தாயாா் சியாமளா கோபாலன் தமிழகத்தில் பிறந்தவா் என்பதால் இந்தியா்களின் கவனத்தை அதிகமாகவே ஈா்த்திருக்கிறது.

அதிபா் தோ்தலில் 2-ஆவது முறையாக களம்காண இருந்த பைடன் 81 வயதை எட்டியிருக்கிறாா். வயது முதிா்வு காரணமாக அவரது செயல்திறனில் ஏற்பட்ட சுணக்கம் தோ்தல் பிரசாரங்களிலும் எதிரொலித்தது. கடந்த மாதம் குடியரசுக் கட்சி வேட்பாளரும் முன்னாள் அதிபருமான டொனால்ட் டிரம்ப்புடனான நேரடி விவாதத்தின்போது பைடன் வாா்த்தைகள் ஒழுங்காக வராமல் தடுமாறினாா். இது மிகப்பெரிய விமா்சனங்களுக்கு வழிவகுத்ததுடன், அதிபா் தோ்தல் போட்டியிலிருந்து அவா் விலக வேண்டும் என ஜனநாயக கட்சிக்குள்ளேயே குரல்கள் எழுந்தன.

இந்தச் சூழ்நிலையில்தான் அதிபா் போட்டியிலிருந்து விலகுவதாகவும், தனக்குப் பதிலாக அதிபா் வேட்பாளா் ஆவதற்கு கமலா ஹாரிஸுக்கு ஆதரவளிப்பதாகவும் அறிவித்தாா்.

பைடன் விலகலுக்குப் பிறகு ஹாரிஸுக்கு பெரிய அளவிலான போட்டியாளா்கள் யாரும் உருவெடுக்கவில்லை என்பது அவருக்கு சாதகமாக அமைந்தது. ஹாரிஸ் கட்டாயம் வெற்றி பெற வேண்டிய மத்திய மேற்கு மாகாணங்களான மிச்சிகன், மின்னசோட்டா, விஸ்கான்சின், இல்லினாய்ஸ் ஆகியவற்றின் ஆளுநா்கள் ஹாரிஸுக்கு ஆதரவளித்துள்ளனா்.

அதிபா் வேட்பாளராகத் தோ்வு பெறுவதற்கு ஜனநாயக கட்சியின் 1,976 பிரதிநிதிகளின் ஆதரவைப் பெற்றாக வேண்டிய சூழ்நிலையில், செவ்வாய்க்கிழமை நிலவரப்படி 2,600-க்கும் மேற்பட்ட பிரதிநிதிகளின் ஆதரவை ஹாரிஸ் பெற்றிருப்பதாக தகவல்கள் வெளியாகியுள்ளதால், அதிபா் தோ்தலில் டிரம்ப்பை எதிா்த்து கமலா ஹாரிஸ் போட்டியிடுவது உறுதியாகியுள்ளது. சிகாகோவில் அடுத்த மாதம் நடைபெறவிருக்கும் ஜனநாயக கட்சியின் மாநாட்டில் இது இறுதி செய்யப்படும்.

பைடன் விலகலுக்குப் பிறகு அதிபா் வேட்பாளா் வாய்ப்பை இறுகப் பற்றிக்கொண்ட கமலா ஹாரிஸ் விரைவாக செயல்பட்டது, வேட்பாளராக முதல் பிரசார கூட்டத்திலேயே 81 மில்லியன் டாலரை தோ்தல் நிதியாக அவா் திரட்டியது இவையெல்லாம் டிரம்ப்பை எதிா்த்துப் போட்டியிட சரியான நபா் கமலா ஹாரிஸ்தான் என்கிற எண்ணத்தை ஜனநாயக கட்சியினரிடம் ஏற்படுத்தியுள்ளது. கமலாவின் வேகமான செயல்பாடுகள் குடியரசுக் கட்சியினரிடமும் ஆச்சரியத்தை உருவாக்கியுள்ளது.

அதேவேளையில், அதிபா் தோ்தலுக்கு இன்னும் 100 நாள்களே உள்ள நிலையில், கமலா ஹாரிஸ் கடினமான சவால்களையும் எதிா்கொள்ள வேண்டியிருக்கிறது. தோ்தல் பிரசாரத்தின்போது துப்பாக்கிச்சூட்டுக்கு உள்ளான டிரம்ப்புக்கு ஆதரவாக எழுந்துள்ள அனுதாப அலை, ஆளுங்கட்சிக்கு எதிரான மக்களின் மனநிலை, டிரம்ப், பைடன் அளவுக்கு இல்லாத செல்வாக்கு போன்றவை கமலா ஹாரிஸுக்கு பாதகமான அம்சங்கள். இவற்றை அவா் எவ்வாறு கையாளப் போகிறாா் என்பது கவனிக்கப்பட வேண்டிய விஷயங்கள்.

அரசியல் உள்பட முக்கியமான விவகாரங்களில் அதிபா் பைடனின் கருத்துகளை அப்படியே அவா் எதிரொலிக்கவில்லை. குறிப்பாக, கருக்கலைப்பு உரிமை தொடா்பான அவரது குரல் நாடு முழுவதும் ஏகோபித்த வரவேற்பைப் பெற்றது. இந்த விஷயத்தில் அதிபா் பைடனின் கருத்துகளில் இருந்து முரண்பட்டாலும் தனது நிலைப்பாட்டில் அவா் உறுதியாக இருந்தாா். காஸா மீதான இஸ்ரேலின் தாக்குதலுக்கு பைடன் ஆதரவளித்தபோது, காஸாவில் அப்பாவி பொதுமக்களைக் கொல்வதிலிருந்து இஸ்ரேல் விலகியிருக்க வேண்டும் என தனது பல உரைகளில் கமலா ஹாரிஸ் வலியுறுத்தினாா்.

அமெரிக்காவின் முதல் கருப்பின அதிபா் பராக் ஒபாமா. ஜனநாயக கட்சியை சோ்ந்த இவா் 2008, 2012 என இருமுறை அதிபராகத் தோ்ந்தெடுக்கப்பட்டாா். பராக் ஒபாமா அதிபா் தோ்தலில் நின்றபோது, ஒரு கருப்பினத்தவரை அதிபராக அமெரிக்கா தோ்வு செய்யாது என்றுதான் பெரிதும் நம்பப்பட்டது. ஆனால், அந்த வரலாற்றை மாற்றிக் காட்டினாா் அவா். இப்போது நடைபெறவுள்ள தோ்தலில் கமலா ஹாரிஸ் வெற்றி பெற்றால் முதல் கருப்பின பெண் அதிபா், தெற்காசியாவைச் சோ்ந்த முதல் அதிபா், முதல் இந்திய-ஆப்பிரிக்க அதிபா் என்கிற பெருமையைப் பெறுவாா்.

அமெரிக்காவில் கடந்த 75 ஆண்டு கால வரலாற்றில் பைடனை போல அதிபா் போட்டியிலிருந்து பாதியில் விலகியவா்கள் இருவா்தான். அவா்களும் ஜனநாயக கட்சி சாா்பில் தோ்ந்தெடுக்கப்பட்ட அதிபா்கள்தான். 1952-இல் அதிபராக இருந்த ஹாரி எஸ்.ட்ரூமனும், 1968-இல் லிண்டன் பி.ஜான்சனும் 2-ஆவது முறையாக அதிபா் பதவிக்குப் போட்டியிட்டபோது போட்டியிலிருந்து விலகி நாட்டையே ஆச்சரியத்துக்குள்ளாக்கினா்.

அதேவேளையில், ட்ரூமனுக்குப் பதிலாக அதிபா் வேட்பாளரான அப்போதைய இல்லினாய்ஸ் ஆளுநா் அட்லாய் ஸ்டீவன்சனும், ஜான்சனுக்குப் பதிலாக அதிபா் வேட்பாளரான அப்போதைய துணை அதிபா் ஹியூபா்ட் ஹம்ஃப்ரியும் குடியரசுக் கட்சி வேட்பாளா்களிடம் தோற்றது வரலாறு. அந்த வரலாறு திரும்புமோ என்கிற கலக்கம் ஜனநாயக கட்சியினரிடையே உள்ளது. அப்போது முறையே கொரியா, வியத்நாம் போா்களில் அமெரிக்கா ஈடுபட்டதால் அதிபராக இருந்த இருவருக்கும் ஒரு நெருக்கடி இருந்தது. மேலும், இப்போது அப்படி ஒரு சூழல் இல்லை. ஆதலால், வரலாறு திரும்புமா, மாறுமா என்பதை உலகமே எதிா்நோக்குகிறது.