காங்கிரஸ் எம்.பி. முகேஷ் காத்வி காலமானார்

குஜராத்தைச் சேர்ந்த காங்கிரஸ் எம்.பி. முகேஷ் காத்வி உடல்நலக்குறைவால் காலமானார். அவருக்கு வயது 50.

குஜராத்தின் பனஸ்கந்தா மக்களவைத் தொகுதி காங்கிரஸ் எம்.பி.யாக இருந்த முகேஷ் காத்விக்கு சமீபத்தில் மூளைச் செயலிழப்பு ஏற்பட்டது. இதையடுத்து அவர் ஆமதாபாதில் உள்ள ஸ்டெர்லிங் மருத்துவமனையில் சேர்க்கப்பட்டார். அங்கு அவரது வெவ்வேறு உடல் உறுப்புகள் செயலிழந்ததைத் தொடர்ந்து வியாழக்கிழமை இறந்தார்.

பனஸ்கந்தா தொகுதியில் இருந்து இரு முறை எம்.பி.யாகவும், தாந்தா தொகுதியில் இருந்து 3 முறை எம்.எல்.ஏ.வாகவும் தேர்வு செய்யப்பட்டவர் முகேஷ் காத்வி. அவருக்கு மனைவி, இரு மகள்கள் மற்றும் ஒரு மகன் ஆகியோர் உள்ளனர். முகேஷ் காத்வியின் மறைவுக்கு குஜராத் முதல்வர் நரேந்திர மோடி, மூத்த காங்கிரஸ் தலைவர் சக்திசிங் கோஹில் உள்ளிட்ட தலைவர்கள் இரங்கல் தெரிவித்துள்ளனர்.

முகேஷ் காத்வியின் தந்தையும், மறைந்த தலைவருமான பி.கே.காத்வி, ராஜீவ்காந்தி அரசில் நிதித்துறை இணை அமைச்சராகவும், குஜராத் மாநில காங்கிரஸ் கமிட்டித் தலைவராகவும் இருந்தவர் என்பது குறிப்பிடத்தக்கது.