அதிகரிக்கும் கடன்: மின் நிறுவன அதிகாரிகளுடன் பிரதமர் ஆலோசனை

மின்சார விநியோக நிறுவனங்களின் செயல்பாடுகளை ஆய்வு செய்வதற்காகவும், அந்த நிறுவனங்களின் கடன்கள் அதிகரித்து வருவது தொடர்பாகவும் அவற்றின் உயரதிகாரிகளுடன் பிரதமர் நரேந்திர மோடி ஆலோசனை நடத்தினார்.
 மின்சார விநியோக நிறுவனங்களின் கடன்கள் ஒட்டுமொத்தமாக, ரூ. 3 லட்சம் கோடி இருக்கும் என்று கணக்கிடப்பட்டுள்ளது. மேலும், கடும் நிதித் தட்டுப்பாடு காரணமாக, அந்த நிறுவனங்களால் மின்சாரத்தை விலை கொடுத்து வாங்க முடியாத சூழல் நிலவுகிறது.
 மின்சார நிறுவனங்களின் கடன்களை அடைத்தால் மட்டுமே "அனைவருக்கும் மின்சாரம்' என்ற இலக்கை எட்ட முடியும் என்பதால், அந்தக் கடன்களைத் தீர்ப்பதற்காக மத்திய அரசு நிதி ஒதுக்கீடு செய்யும் என்ற எதிர்பார்ப்பு நிலவுகிறது.
 இந்நிலையில், ""மின்சார விநியோக நிறுவனங்களின் செயல்பாடுகளை அதிகரிப்பது தொடர்பாகவும், கடன்கள் அதிகரித்து வருவது தொடர்பாகவும் அந்த நிறுவனங்களின் உயரதிகாரிகளுடன் பிரதமர் மோடி திங்கள்கிழமை ஆலோசனை நடத்தினார்'' என்று மத்திய அரசு வட்டாரங்கள் தெரிவித்தன.
 எனினும், மின்சார விநியோக நிறுவனங்களுக்கு நிதி ஒதுக்கும் திட்டம் திட்டம் எதுவும் மத்திய அரசிடம் இல்லை என்றும், அதற்கான தீர்வுகளை மாநில அரசுகள்தான் எடுக்க வேண்டும் என்றும் மத்திய எரிசக்தித் துறை அமைச்சர் பியூஷ் கோயல் கடந்த மாதம் தெரிவித்திருந்தார்.