மும்பை குண்டு வெடிப்பு வழக்கு: குறைவான தண்டனைக்கு கோரிக்கை

மும்பை புறநகர் ரயில் தொடர் குண்டு வெடிப்பு வழக்கு குற்றவாளிகள் 12 பேரும், தங்களது தண்டனையைக் குறைத்து வழங்குமாறு நீதிமன்றத்தில் கோரினர்.
 கடந்த 2006-ஆம் ஆண்டு மும்பையின் புறநகர் ரயில்களில் நிகழ்த்தப்பட்ட தொடர் குண்டுவெடிப்பில் 188 பேர் உயிரிழந்தனர். இது தொடர்பாக சிமி பயங்கரவாத இயக்கத்தைச் சேர்ந்த 13 பேர் கைது செய்யப்பட்டனர்.
 மும்பை சிறப்பு நீதிமன்றத்தில் நடைபெற்று வந்த இந்த வழக்கில், விசாரணை நிறைவடைந்து கடந்த வெள்ளிக்கிழமை தீர்ப்பு வழங்கப்பட்டது. குற்றம்சாட்டப்பட்ட 13 பேரில் 12 பேர் குற்றவாளிகள் என சிறப்பு நீதிமன்ற நீதிபதி யதின் டி சிண்டே தீர்ப்பளித்தார்.
 இந்நிலையில், அவர்களுக்கு விதிக்கப்படவுள்ள தண்டனை மீதான வாதம் திங்கள்கிழமை தொடங்கியது. அவர்கள் நீதிபதி முன் தனித்தனியே ஆஜராகினர். தங்களது குடும்பச் சூழ்நிலைகளையும், ஏற்கெனவே சிறையில் கழித்த காலங்களையும் கருத்தில் கொண்டு, தண்டனையைக் குறைத்து வழங்குமாறு அவர்கள் கோரிக்கை விடுத்தனர். குற்றவாளிகளின் வழக்குரைஞர்கள் தரப்பு வாதங்களும், அரசுத் தரப்பு வாதங்களும் செவ்வாய்க்கிழமை நடைபெற உள்ளது.