நீதிமன்றத்தை மீன் சந்தை போல மாற்ற வேண்டாம்: வழக்குரைஞர்களுக்கு உச்ச நீதிமன்றம் எச்சரிக்கை

உச்ச நீதிமன்றத்தில் நீதிபதி பி.எச்.லோயா மர்ம மரண வழக்கு விசாரணையின்போது வழக்குரைஞர்களுக்கு இடையே திங்கள்கிழமை கடும் வாக்குவாதம் ஏற்பட்டது. அப்போது, நீதிமன்ற அறையை மீன் சந்தை போல மாற்றிவிட வேண்டாம் என்று நீதிபதிகள் எச்சரித்தனர்.
மும்பை சிபிஐ சிறப்பு நீதிமன்ற நீதிபதியாக இருந்த பி.எச்.லோயா தனது உறவினர் இல்லத் திருமண நிகழ்ச்சிக்கு கடந்த 2014-ஆம் ஆண்டு டிசம்பர் 1-ஆம் தேதி, நாகபுரிக்குச் சென்றிருந்தபோது மர்மமான முறையில் உயிரிழந்தார். அவர் மாரப்பால் உயிரிழந்ததாகக் கூறப்பட்டது. நீதிபதி பி.எச்.லோயா, சொராபுதீன் என்கவுன்ட்டரில் கொல்லப்பட்ட வழக்கை விசாரித்து வந்தார். அவரது மறைவுக்குப் பிறகு, சொராபுதீன் என்கவுன்ட்டர் வழக்கில் இருந்து பாஜக தேசியத் தலைவர் அமித் ஷா விடுவிக்கப்பட்டார்.
இந்நிலையில், நீதிபதி லோயாவின் மரணத்தில் மர்மம் இருப்பதாகவும், இதுதொடர்பாக சுதந்திரமான விசாரணை நடத்தக் கோரியும் மும்பையைச் சேர்ந்த பத்திரிகையாளர் பந்துராஜ் சம்பாஜி, காங்கிரஸ் பிரமுகர் தெஹ்சீன் பூனாவாலா ஆகியோர் சார்பில் உச்ச நீதிமன்றத்தில் பொதுநல மனுக்கள் தாக்கல் செய்யப்பட்டன.
அந்த மனுக்கள், உச்ச நீதிமன்றத்தில் தலைமை நீதிபதி தீபக் மிஸ்ரா, நீதிபதிகள் சந்திரசூட், ஏ.எம்.கான்வில்கர் ஆகியோரைக் கொண்ட அமர்வு முன் திங்கள்கிழமை விசாரணைக்கு வந்தது. 
அப்போது, மனுதாரர் சார்பில் மூத்த வழக்குரைஞர் பல்லவ சிசோடியாவும், மும்பை வழக்குரைஞர்கள் சங்கம் சார்பில் துஷ்யந்த் தவேவும் ஆஜரானார்கள். அப்போது, பல்லவ சிசோடியாவைப் பார்த்து, ''இந்த வழக்கை கீழமை நீதிமன்றம் விசாரித்தபோது, அமித் ஷா சார்பிலும், இப்போது மனுதாரர் சார்பிலும் வாதாடுகிறீர்களே!'' என்று துஷ்யந்த் தவே ஏளனமாகக் கூறினார். அதைத் தொடர்ந்து இருவரும் கடுமையான சொற்களால் ஒருவரை ஒருவர் விமர்சித்துக் கொண்டனர்.
இதனால் கோபமடைந்த நீதிபதிகள், 'முதலில் நாங்கள் சொல்வதை கவனியுங்கள்; நீதிமன்ற அறையை மீன் சந்தைபோல மாற்ற வேண்டாம்' துஷ்யந்த் தவேவை எச்சரித்தனர். 
அதற்கு மறுப்பு தெரிவித்த தவே, ''முதலில் பல்லவ சிசோடியாவையும், மகாராஷ்டிர அரசு வழக்குரைஞர் ஹரீஷ் சால்வேவையும் தடுத்து நிறுத்துங்கள்; மனசாட்சிப்படி பேசுங்கள்'' என்றார். 
அப்போது, ''மனசாட்சி பற்றி எங்களுக்குப் பாடம் புகட்ட வேண்டாம்'' என்று துஷ்யந்த் தவேவை நீதிபதி கான்வில்கர் எச்சரித்தார். அதைத் தொடர்ந்து, நீதின்ற விசாரணையின்போது கண்ணியமாக நடந்து கொள்ளுங்கள் என்று நீதிபதி சந்திரசூடும் அறிவுறுத்தினர்.
அதைத் தொடர்ந்து, 'என்னைப் போன்ற வழக்குரைஞர்கள் குரல் எழுப்புவதை முடக்குவதற்காக, இந்திய பார் கவுன்சில் மூலம் எங்களுக்கு நோட்டீஸ் அனுப்பப்படுகிறது. ஏற்கெனவே அமித் ஷா சார்பில் ஆஜரான பல்லவ சிசோடியா, இந்த வழக்கிலும் ஆஜராகத் தடை விதிக்க வேண்டும்' என்று தவே கூறினார்.
அதைத் தொடர்ந்து நீதிபதிகள் கூறியதாவது:
வழக்குரைஞர்கள் துஷ்யந்த் தவே, பல்லவ சிசோடியா ஆகியோரின் செயல்கள் மன்னிக்க முடியாதவை. அவர்கள் மீன் சந்தையில் சண்டை போடுவது போல் வாக்குவாதம் செய்துள்ளனர். இது வழக்குரைஞர் பணிக்கு உகந்தது அல்ல என்று கூறினர்.
அதைத் தொடர்ந்து வழக்கின் அடுத்த விசாரணை, வரும் 9-ஆம் தேதிக்கு ஒத்திவைக்கப்பட்டது.
புதிய மனு: இதனிடையே, நீதிபதி பி.எச்.லோயா மர்ம மரணம் தொடர்பாக, 2 நீதிபதி உள்பட 11 பேரிடம் குறுக்கு விசாரணை நடத்தக் கோரி, மும்பை வழக்குரைஞர்கள் சங்கம் சார்பில் உச்ச நீதிமன்றத்தில் செவ்வாய்க்கிழமை புதிய மனு ஒன்று தாக்கல் செய்யப்படவுள்ளது.