அதிகாரப்பூர்வ இணையதளமோ, சுட்டுரைப் பக்கமோ இல்லை

பகுஜன் சமாஜ் கட்சிக்கு அதிகாரப்பூர்வ இணையதளம், சுட்டுரைப் பக்கம், முகநூல் பக்கம் போன்றவை இல்லை என அக்கட்சித் தலைவர் மாயாவதி தெரிவித்துள்ளார்.
இது குறித்து பகுஜன் சமாஜ் கட்சி வெளியிட்டுள்ள அறிக்கையில் தெரிவிக்கப்பட்டுள்ளதாவது: கட்சியின் அனைத்து நிர்வாகக் குழுக்களிலும், ஏறக்குறைய 50 சதவிகிதம் பேர் இளைஞர்களே உள்ளனர். எனவே கட்சிக்கு எனத் தனியாக இளைஞர் அணி எதுவும் அமைக்கப்படவில்லை. இது போன்று, பெண்கள், மாணவர்கள் ஆகியோருக்கும் தனியாக அணிகள் எதுவும் கட்சியின் சார்பாக அதிகாரப்பூர்வமாக அமைக்கப்படவில்லை.
கட்சிக்கு அதிகாரப்பூர்வ இணையதளம், சுட்டுரைப் பக்கம், முகநூல் பக்கம் போன்றவை உருவாக்கப்படவில்லை. கட்சியின் பெயரில் இயங்கி வரும் இது போன்ற இணையப் பக்கங்கள் அனைத்தும் கட்சியினால் அங்கீகரிக்கப்படாதவை. 
மேலும், கட்சியின் சார்பாகக் கருத்துகளைத் தெரிவிக்கும் அதிகாரம், கட்சியின் மூத்த தலைவர் சுதீந்திர பதோரியாவிற்கு மட்டுமே வழங்கப் பட்டுள்ளதாகவும், வேறு யாருக்கும் அத்தகைய அதிகாரங்கள் வழங்கப்படவில்லை என்றும் அந்த அறிக்கையில் தெரிவிக்கப்பட்டுள்ளது.
தேவசிஸ் ஜராரியா என்ற இளைஞர், பகுஜன் சமாஜ் கட்சியின் பெயரில் போலியாக இணையதளம் ஒன்றை நடத்தி, சில தனியார் தொலைக்காட்சிகளின் விவாத நிகழ்ச்சிகளிலும் பங்கேற்று, உறுப்பினர் சேர்க்கைக்குக் கட்டணம் வசூலித்ததாகப் புகார் எழுந்ததையடுத்து, மாயாவதி இந்த அறிக்கையை வெளியிட்டுள்ளார்.