ஹிந்துக்களுக்கு மட்டுமே சேவை: கர்நாடக பாஜக எம்எல்ஏ பேச்சு

தமக்கு வாக்களித்த ஹிந்துக்களுக்கு மட்டும் சேவையாற்றினால் போதும். முஸ்லிம்களுக்கு சேவையாற்ற வேண்டியதில்லை என்று கர்நாடக பாஜக எம்எல்ஏ பசனகெளடா பாடில் யாத்னால் பேசியிருப்பது புதிய சர்ச்சையை ஏற்படுத்தியுள்ளது.
கடந்த 4-ஆம் தேதி விஜயபூராவில் நடைபெற்ற நிகழ்ச்சியொன்றில் இவ்வாறு அவர் பேசிய விடியோ, தற்போது சமூக வலைதளங்களில் வேகமாக பரவி வருகிறது.
அதில், மாநகராட்சி பணியாளர்கள் அனைவரையும் அழைத்து, பீஜபூரில் எனக்கு வாக்களித்த ஹிந்துக்களுக்கு மட்டும் சேவையாற்றினால் போதும், முஸ்லிம்களுக்கு வேண்டியதில்லை என அறிவுறுத்தினேன். தொடக்கத்தில் இருந்தே முஸ்லிம்களை நான் ஒதுக்கி வருகிறேன். தலையில் குல்லா போட்டிருப்பவர்கள், பர்கா அணிந்திருப்பவர்களும் எனது அலுவலகம் அல்லது என் முன்னால் வந்து நிற்க கூடாது என்றும் அறிவுறுத்தியிருக்கிறேன் என்று பசனகெளடா பேசியிருக்கிறார். முன்னாள் பிரதமர் வாஜ்பாய் ஆட்சிக் காலத்தில், இதே பசனகெளடா மத்திய அமைச்சராக இருந்தார் என்பது குறிப்பிடத்தக்கது.