மோகன் பாகவத்துடன் யோகி சந்திப்பு

ஆர்எஸ்எஸ் அமைப்பின் தலைவர் மோகன் பாகவத், அந்த அமைப்பின் செயல் தலைவர் பையாஜி ஜோஷி ஆகியோரை உத்தரப் பிரதேச முதல்வர் யோகி ஆதித்யநாத், தில்லியில் செவ்வாய்க்கிழமை சந்தித்துப் பேசினார்.
அயோத்தியில் ராமர் கோயில் கட்டப்படும் என்று கடந்த திங்கள்கிழமை யோகி ஆதித்யநாத் தெரிவித்திருந்த நிலையில், இந்தச் சந்திப்பு முக்கியத்துவம் வாய்ந்ததாகக் கருதப்படுகிறது. விஸ்வ ஹிந்து பரிஷத் அமைப்பும், அயோத்தியில் சர்ச்சைக்குரிய பகுதியில் ராமர் கோயில் கட்டப்படும் என்று தெரிவித்துள்ளது.
அடுத்த ஆண்டு மக்களவைத் தேர்தல் நடைபெறவுள்ள நிலையில், அதுதொடர்பாகவும் இந்தச் சந்திப்பில் ஆலோசிக்கப்பட்டிருக்கலாம் என்று தகவல்கள் தெரிவிக்கின்றன.
இதனிடையே, அயோத்திக்கு செவ்வாய்க்கிழமை வந்த மத்திய அமைச்சர் உமா பாரதி, இந்த விவகாரத்தில் அமைதி காக்க மாட்டேன் என்றும் கூடிய விரைவில் ராமர் கோயில் கட்டப்பட வேண்டும் என்றும் தெரிவித்தார்.