மம்தாவுடன் யஷ்வந்த் சந்திப்பு: கருத்து கூற ஜெயந்த் சின்ஹா மறுப்பு

மேற்கு வங்க முதல்வர் மம்தா பானர்ஜியை தன் தந்தையும், பாஜக அதிருப்தி தலைவருமான யஷ்வந்த் சின்ஹா சந்தித்தது குறித்த கேள்விக்கு நேரடியாக பதிலளிக்க மத்திய அமைச்சர் ஜெயந்த் சின்ஹா மறுத்துவிட்டார்.
வாஜ்பாய் தலைமையிலான தேசிய ஜனநாயகக் கூட்டணி அரசில் நிதியமைச்சராக பதவி வகித்தவர் யஷ்வந்த் சின்ஹா. இவர் அண்மைக் காலமாக பாஜக தலைமை மீதும், மோடி மீதும் அதிருப்தியில் உள்ளார். அவ்வப்போது மத்திய அரசுக்கு எதிராக கருத்து கூறி வருகிறார்.
இதனிடையே, மேற்கு வங்க முதல்வர் மம்தா பானர்ஜியை யஷ்வந்த் சின்ஹாவும், பாஜகவின் மற்ற அதிருப்தி தலைவர்களான சத்ருகன் சின்ஹா, அருண் சௌரி ஆகியோரும் சந்தித்தனர்.
இந்நிலையில், மம்தா பானர்ஜியை தன் தந்தை யஷ்வந்த் சின்ஹா சந்தித்தது தொடர்பாக மத்திய அமைச்சர் ஜெயந்த் சின்ஹா நேரடியாக பதில் கூற மறுத்துவிட்டார். அவரிடம் இந்த விவகாரம் குறித்து ராஞ்சியில் செய்தியாளர்கள் வியாழக்கிழமை கேள்வி எழுப்பினர். அதற்கு 'என் தந்தைக்கான கேள்வியை அவரிடமும், எனக்கான கேள்வியை என்னிடமும் கேளுங்கள். தனது கருத்துகளைக் கூற அனைவருக்கும் சுதந்திரம் உள்ளது' என்று அவர் பதிலளித்தார்.
தொடர்ந்து அவர் செய்தியாளர்களிடம் பேசுகையில் 'கடந்த சில வாரங்களாக எதிர்க்கட்சிகளின் அமளி காரணமாக நாடாளுமன்றத்தில் எந்த அலுவலும் நடைபெறவில்லை. நாம் (எம்.பி.க்கள்) பல்வேறு தொலைதூரப் பகுதிகளில் இருந்து நாட்டுக்குச் சேவையாற்ற வந்துள்ளோம். இந்தச் சூழலில் நாடாளுமன்றம் செயல்படாமல் முடங்குவது வருத்தமளிக்கிறது' என்றார்.