பிரிவு உபசார விழா அழைப்பை நிராகரித்தார் நீதிபதி செலமேஸ்வர்

உச்ச நீதிமன்ற நீதிபதி பதவியிலிருந்து விரைவில் ஓய்வுபெற இருக்கும் மூத்த நீதிபதி செலமேஸ்வர், தனக்கு பிரிவு உபசார விழா நடத்துவது தொடர்பாக அனுப்பப்பட்ட அழைப்பை நிராகரித்து விட்டார்.
உச்ச நீதிமன்ற மூத்த நீதிபதியான செலமேஸ்வர், பிற மூத்த நீதிபதிகள் ரஞ்சன் கோகோய், எம்.பி. லோகுர், குரியன் ஜோசப் ஆகியோருடன் சேர்ந்து உச்ச நீதிமன்ற தலைமை நீதிபதி தீபக் மிஸ்ராவை விமர்சித்து செய்தியாளர்களுக்கு கடந்த ஜனவரி மாதம் பேட்டியளித்தார். இதனால் அவர் சர்ச்சைக்கு ஆளானார்.
இந்நிலையில், உச்ச நீதிமன்ற நீதிபதி பதவியிலிருந்து விரைவில் ஓய்வு பெற இருக்கும் செலமேஸ்வருக்கு வரும் 18ஆம் தேதி பிரிவு உபசார விழா நடத்துவது தொடர்பான அழைப்பை உச்ச நீதிமன்ற வழக்குரைஞர்கள் சங்கம் அனுப்பியது. இதை செலமேஸ்வர் நிராகரித்து விட்டார்.
இதுகுறித்து உச்ச நீதிமன்ற வழக்குரைஞர்கள் சங்கத் தலைவர் விகாஸ் சிங் செய்தியாளர்களிடம் கூறுகையில், 'பிரிவு உபசார விழா அழைப்பை செலமேஸ்வர் நிராகரித்து விட்டார். இருப்பினும், அந்த அழைப்பை ஏற்க வேண்டும் என்று செலமேஸ்வரை சந்தித்து உச்ச நீதிமன்ற வழக்குரைஞர்கள் சங்கத்தினர் புதன்கிழமை மீண்டும் வலியுறுத்தினர். ஆனால், தனிப்பட்ட காரணங்களுக்காக அந்த அழைப்பை ஏற்க முடியாது என செலமேஸ்வர் தெரிவித்து விட்டார். இதற்கு முன்பு ஆந்திர உயர் நீதிமன்றத்தில் இருந்து வேறு உயர் நீதிமன்றத்துக்கு பணியிட மாற்றம் செய்யப்பட்டபோதும், பிரிவு உபசார விழா அழைப்பை தாம் ஏற்கவில்லை என்றும் செலமேஸ்வர் தெரிவித்தார்' என்றார்.
உச்ச நீதிமன்ற வழக்குரைஞர்கள் சங்க செயலாளர் விக்ராந்த் யாதவ் கூறுகையில், 'வழக்குரைஞர்கள் சங்க உறுப்பினர்களை செலமேஸ்வர் தனது இல்லத்தில் புதன்கிழமை சந்தித்தார். அப்போது அவர்களுடன் குறிப்பிட்ட நேரம் அவர் பேசிக் கொண்டிருந்தார். எனினும், பிரிவு உபசார விழா அழைப்பை ஏற்கவில்லை' என்றார்.
உச்ச நீதிமன்ற பணியிலும் நீதிபதி செலமேஸ்வர் புதன்கிழமை கலந்து கொள்ளவில்லை. வாரந்தோறும் புதன்கிழமை உச்ச நீதிமன்ற நீதிபதிகள் யாரேனும் ஒருவர் தங்களின் வீட்டில் தயாரிக்கப்படும் உணவை எடுத்து வந்து, சக நீதிபதிகளுக்கு விருந்து அளித்து உபசரிப்பது வழக்கம். இந்த விருந்திலும், நீதிபதி செலமேஸ்வர் தொடர்ந்து 3ஆவது வாரமாக பங்கேற்கவில்லை என்பது குறிப்பிடத்தக்கது.