விண்வெளிக்கு மனிதர்களை அனுப்பும் திட்டம்: இந்தியா, பிரான்ஸ் இடையே புரிந்துணர்வு ஒப்பந்தம் கையெழுத்து

விண்வெளித் துறையில் இந்தியா, பிரான்ஸ் இடையேயான ஒத்துழைப்பு மேலும் அதிகரித்துள்ளது. விண்வெளிக்கு மனிதர்களை அனுப்பும் திட்டத்தில் இணைந்து செயல்படுவதற்கான புரிந்துணர்வு ஒப்பந்தத்தில் இவ்விரு நாடுகளும் வியாழக்கிழமை கையெழுத்திட்டன.
ககன்யான்' திட்டத்தின் கீழ், வரும் 2022-ஆம் ஆண்டுக்குள் விண்வெளிக்கு மனிதர்களை அனுப்பும் திட்டத்தை நிறைவேற்ற மத்திய அரசு முடிவு செய்துள்ளது. அந்தத் திட்டத்தின்படி, விண்வெளிக்கு 3 பேரை அனுப்பி வைப்பதற்கு திட்டமிடப்பட்டுள்ளது. இத்திட்டத்தை இந்திய விண்வெளி ஆய்வு மையம் (இஸ்ரோ) நிறைவேற்றுமானால், ரஷியா, அமெரிக்கா, சீனா ஆகிய நாடுகளுக்கு அடுத்தப்படியாக, விண்வெளிக்கு மனிதர்களை அனுப்பிய நாடுகளின் பட்டியலில் 4-ஆவதாக இந்தியா இடம்பெறும்.
இந்நிலையில், ககன்யான்' திட்டத்தை நிறைவேற்றுவதற்கான பணிகளை இஸ்ரோ முன்னெடுத்துள்ளது. அதன் ஒரு பகுதியாக, இந்த திட்டத்தில் இணைந்து செயல்படுவதற்கு இஸ்ரோவும், பிரான்ஸின் தேசிய விண்வெளி ஆய்வு மையமும் முடிவு செய்துள்ளன. பெங்களூரில் வியாழக்கிழமை நடைபெற்ற நிகழ்ச்சியில் இதற்கான புரிந்துணர்வு ஒப்பந்தம் கையெழுத்தானது.
இதுகுறித்து, பிரான்ஸ் விண்வெளி ஆய்வு மையத்தின் தலைவர் ஜீன் ஈவ்ஸ் லி கால் கூறியதாவது:
இந்த ஒப்பந்தப்படி, பிரான்ஸில் விண்வெளி வீரர்களுக்கான மருத்துவமனையை இஸ்ரோ அமைத்துக் கொள்ளும். இதுதவிர, இரு நாடுகளின் மருத்துவர்கள் இணைந்து செயல்படுவார்கள். அவர்கள், விண்வெளி வீரர்களின் உடல்நிலைக் கண்காணிப்பது, உயிர் காக்கும் கருவிகளை அளிப்பது, கதிர்வீச்சில் இருந்து வீரர்களை பாதுகாப்பது, விண்வெளி கழிவுகளில் இருந்து பாதுகாப்பது ஆகிய பணிகளை மேற்கொள்வர் என்றார் அவர்.