உள்துறை அமைச்சர்  ராஜ்நாத் சிங்குக்கு எதிராக பிரபல நடிகரின் மனைவி போட்டி    

லக்னௌ: உத்தர பிரதேச மாநிலம் லக்னௌவில் உள்துறை அமைச்சர்  ராஜ்நாத் சிங்குக்கு எதிராக பிரபல நடிகரின் மனைவி போட்டியிட உள்ளதாக தகவல்கள் வெளியாகியுள்ளது.

மத்திய உள்துறை அமைச்சர்  ராஜ்நாத் சிங் பாஜகவின் முக்கிய தலைவர்களில் ஓருவராவார். நாடாளுமன்றத் தேர்தலில் இவர் உத்தர பிரதேச மாநிலம் லக்னௌவில் போட்டியிட உள்ளார்.

இந்நிலையில் உத்தர பிரதேச மாநிலம் லக்னௌவில் உள்துறை அமைச்சர்  ராஜ்நாத் சிங்குக்கு எதிராக பிரபல நடிகரின் மனைவி போட்டியிட உள்ளதாக தகவல்கள் வெளியாகியுள்ளது.

பாஜகவில் இருந்து எம்.பியாகத் தேர்ந்துடுக்கப்பட்டவரும் தற்போது அக்கட்சித் தலைமைக்கு எதிராக போர்க்குரல் எழுப்பியுள்ளவருமான நடிகர் சத்ருகன் சின்ஹா, சமீபத்தில் காங்கிரஸ் தலைவர் ராகுல் காந்தியை சந்தித்துப் பேசினார். அத்துடன் அவர் வரும் 6-ஆம் தேதியன்று காங்கிரசில் அதிகாரப்பூர்வமாக அவர் இணைய உள்ளதாக செய்தியாளர்களிடம் தெரிவித்துள்ளார்.      

தற்போது அவரது மனைவியான பூனம் சின்ஹா உத்தர பிரதேச மாநிலம் லக்னௌவில் உள்துறை அமைச்சர்  ராஜ்நாத் சிங்குக்கு எதிராக போட்டியிட உள்ளார் என்று தகவல்கள் வெளியாகியுள்ளது.

சமாஜ்வாதிக் கட்சியின் சார்பாக அவர் போட்டியிட உள்ளார் என்றும், பகுஜன் சமாஜ் கட்சியும் பூனம் சின்ஹாவுக்கு ஆதரவு அளிக்கும் என்று தெரிகிறது.

ஏற்கனவே உ.பியில் சோனியா மற்றும் ராகுலுக்கு எதிராக வேட்பாளர்களை நிறுத்தப் போவதில்லை என்று சமாஜ்வாதி - பகுஜன் சமாஜ் கூட்டணி அறிவித்துள்ளது. அதேபோல இந்த கூட்டணிக்கு எதிராக 7 தொகுதிகளில் வேட்பாளர்களை நிறுத்தப் போவதில்லை என்று காங்கிரசும் அறிவித்துள்ளது.

அந்த 7 தொகுதிகளில் ராஜ்நாத்தின் லக்னௌவும் ஒன்று என்று காங்கிரஸ் வட்டாரங்கள் தெரிவிக்கின்றன.

அதேபோல முன்னரே நடைபெற்றுள்ள பேச்சுவார்தையின் படி பிகாரின் பாட்னா சாஹிப் தொகுதியில் சத்ருகன் சின்ஹா போட்டியிடுவார் என்று தெரிகிறது.