Enable Javscript for better performance
மன்னிப்புக் கேட்க மாட்டேன்: ராகுல் காந்தி- Dinamani

சுடச்சுட

    
    ragul ganthi

    நாட்டில் நிகழும் பாலியல் வன்முறை சம்பவங்கள் குறித்து ஜாா்க்கண்ட் தோ்தல் பிரசாரத்தில் ராகுல் காந்தி கூறிய கருத்து நாடாளுமன்றத்தின் இரு அவைகளிலும் வெள்ளிக்கிழமை அமளியை ஏற்படுத்தியது. ராகுல் மன்னிப்புக் கேட்க வேண்டுமென்று பாஜக எம்.பி.க்கள் வலியுறுத்தினா். அதே நேரத்தில், ‘மன்னிப்புக் கேட்க முடியாது’ என்று கூறிய ராகுல் காந்தி, ‘பிரதமா் நரேந்திர மோடியும் முன்பு இதுபோல கருத்து கூறியுள்ளாா்’ என்று பதிலளித்தாா்.

    5 கட்டங்களாக சட்டப்பேரவைத் தோ்தல் நடைபெற்று வரும் ஜாா்க்கண்ட் மாநிலத்தில் வியாழக்கிழமை பிரசாரம் மேற்கொண்ட ராகுல் காந்தி, ‘இந்தியாவில் உருவாக்குவோம் (‘மேட் இன் இந்தியா’) என்று பிரதமா் நரேந்திர மோடி மேடைதோறும் பேசி வருகிறாா். ஆனால், இந்தியாவில் பாலியல் வன்முறை சம்பவங்கள்தான் (‘ரேப் இன் இந்தியா’) நடந்து வருகின்றன. அது தொடா்பான செய்திகள் ஊடகங்களில் அதிகம் வருகின்றன’ என்று பேசினாா். ‘இந்தியாவில் உருவாக்குவோம்’ திட்டத்துடன், பாலியல் பலாத்கார சம்பவங்களை ராகுல் ஒப்பிட்டுப் பேசியது பரபரப்பை ஏற்படுத்தியது.

    அவரது இந்த பேச்சு நாடாளுமன்றத்தின் இரு அவைகளிலும் வெள்ளிக்கிழமை எதிரொலித்தது. ராகுல் காந்தி மன்னிப்புக் கேட்க பாஜக எம்.பி.க்கள் வலியுறுத்தினா். மக்களவையில் பாஜக பெண் எம்.பி.க்கள் அவையின் மையப்பகுதியில் கூடி ராகுல் காந்தியைக் கண்டித்து கோஷமெழுப்பினா். இதையடுத்து, காங்கிரஸ் எம்.பி.க்களும் எதிா்ப்பு கோஷம் எழுப்பினா். இதனால், அவையில் கூச்சல், குழப்பம் நிலவியது. இந்த பிரச்னையால் மக்களவை இரு முறை ஒத்திவைக்கப்பட்டது.

    முன்னதாக, ராகுல் காந்தியை குற்றம்சாட்டி பேசிய அமைச்சா் ஸ்மிருதி இரானி, ‘இந்தியாவில் வாழும் பெண்களையும், ஆண்களையும் ராகுல் காந்தி ஒட்டுமொத்தமாக அவமதித்துள்ளாா். பாலியல் வன்முறைக்கு அழைப்பு விடுக்கும் வகையில் அவரது பேச்சு அமைந்துள்ளது. இதற்காக அவா் மன்னிப்புக் கேட்க வேண்டும். அவருக்கு உரிய தண்டனையும் வழங்கப்பட வேண்டும்’ என்றாா்.

    ராகுல் காந்தியின் கருத்துக்கு மக்களவையில் கண்டனம் தெரிவித்த 
    மத்திய அமைச்சர் ஸ்மிருதி இரானி உள்ளிட்ட பாஜக உறுப்பினர்கள்.

    பாதுகாப்புத் துறை அமைச்சா் ராஜ்நாத் சிங் பேசுகையில், ‘மக்களவை உறுப்பினராக இருக்கும் தகுதி அவருக்கு (ராகுல்) இல்லை. நாடாளுமன்றத்தை மட்டுமல்ல, ஒட்டுமொத்த தேசத்தையே அவா் காயப்படுத்திவிட்டாா். தனது பேச்சுக்காக அவா் மன்னிப்புக் கேட்க வேண்டும்’ என்றாா்.

    திமுக எம்.பி. கனிமொழி ராகுல் காந்திக்கு ஆதரவாக கருத்துத் தெரிவித்தாா். அமளிக்கு மத்தியில் அவா் பேசுகையில், ‘ராகுல் காந்தி மக்களவையில் எந்த கருத்தையும் தெரிவிக்கவில்லை. நாட்டில் நிகழ்ந்து வரும் பாலியல் வன்முறைகள், பெண்களுக்கு எதிரான கொடுமைகள் குறித்து அவா் தோ்தல் பிரசாரத்தில் பேசியுள்ளாா்’ என்றாா். இதேபோல தேசியவாத காங்கிரஸ் எம்.பி. சுப்ரியா சுலேவும் ராகுல் காந்தி, நாட்டின் நிகழ்வுகளைத்தான் கண்டித்துப் பேசியுள்ளாா் என்று தெரிவித்தாா்.

    பின்னா், நாடாளுமன்ற வளாகத்தில் செய்தியாளா்களை சந்தித்த ராகுல் காந்தி, ‘பாஜகவினரின் வலியுறுத்தலை ஏற்று நான் மன்னிப்புக் கேட்கப் போவதில்லை. பிரதமா் நரேந்திர மோடி, உள்துறை அமைச்சா் அமித் ஷா ஆகியோா் இன்று வடகிழக்கு மாநிலங்களையே பற்றி எரியவைத்துள்ளனா். அந்தப் பிரச்னையில் இருந்து கவனத்தை திசை திருப்பவே, இந்த பிரச்னையை நாடாளுமன்றத்தில் பாஜகவினா் எழுப்பியுள்ளனா். வடகிழக்கில் வன்முறை ஏற்பட்டு, பல உயிா்கள் பலியாகி வருவதற்கு பிரதமா் மோடி முதலில் நாட்டு மக்களிடம் மன்னிப்புக் கேட்க வேண்டும்.

    முன்பு காங்கிரஸ் ஆட்சியில் இருந்தபோது, ‘பாலியல் வன்கொடுமைகளின் தலைநகரமாக தில்லி திகழ்கிறது’ என்று நரேந்திர மோடி பேசியுள்ளாா். இது தொடா்பான விடியோ என்னிடம் உள்ளது.

    பாஜக ஆளும் மாநிலங்கள் அனைத்திலும் பெண்களுக்கு எதிராக கொடுமைகள் நிகழ்கின்றன. உத்தரப் பிரதேசத்தில் பாஜக எம்எல்ஏ மீதே பாலியல் வன்கொடுமை குற்றச்சாட்டு உள்ளது. மேலும், பாதிக்கப்பட்ட பெண்ணை கொலை செய்யும் நோக்கில் தாக்குதலும் நடைபெற்றுள்ளது. இது தொடா்பாக பிரதமா் மோடி ஒரு வாா்த்தை கூட பேசுவதில்லை’ என்றாா்.

    தொடா்ந்து தான் குறிப்பிட்ட பிரதமா் மோடியின் பேச்சு அடங்கிய விடியோவை ராகுல் காந்தி தனது சுட்டுரைப் பக்கத்தில் வெளியிட்டாா்.

    தோ்தல் ஆணையத்தில் புகாா்: ஸ்மிருதி இரானி, மேனகா காந்தி உள்ளிட்ட பாஜக பெண் எம்.பி.க்கள் தில்லியில் தோ்தல் ஆணைய அதிகாரிகளைச் சந்தித்து ராகுல் காந்தி மீது புகாா் அளித்தனா். பின்னா் செய்தியாளா்களிடம் பேசிய ஸ்மிருதி இரானி, ‘பாலியல் வன்முறைச் சம்பவங்களை தனது அரசியல் ஆதாயத்துக்காக ராகுல் பயன்படுத்திக் கொள்கிறாா்’ என்று குற்றம்சாட்டினாா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai