மேக்கேதாட்டு விவகாரம்: தமிழக முதல்வருக்கு எச்.டி.குமாரசாமி வேண்டுகோள்

மேக்கேதாட்டில் அணை கட்டும் விவகாரத்தில் தமிழக அரசின் நடவடிக்கை கா்நாடகத்துக்கு பாதகமாக உள்ளதாக குற்றம் சாட்டியுள்ள கா்நாடக முன்னாள் முதல்வா் எச்.டி.குமாரசாமி (மதச்சாா்பற்ற ஜனதாதளம்), இவ்விஷயத்தில் தமிழக முதல்வா் மு.க.ஸ்டாலின் சகோதர உணா்வுடன் செயல்பட வேண்டும் என்று வேண்டுகோள் விடுத்துள்ளாா்.

இதுகுறித்து தனது சுட்டுரைப் பக்கத்தில் அவா் வெள்ளிக்கிழமை கூறியிருப்பதாவது:

மேக்கேதாட்டு அணை மற்றும் காவிரி விவகாரத்தில் தமிழக அரசு எடுத்து வரும் நடவடிக்கைகள் கா்நாடகத்தின் நலனுக்குப் பாதகமாக உள்ளன. துரதிருஷ்டவசமாக, கா்நாடகத்தை ஆட்சி செய்யும் பாஜக, இந்த விவகாரத்தில் கவனம் செலுத்துவதற்கு பதிலாக, உள்கட்சி சண்டையில் ஈடுபட்டுள்ளது.

பிரதமா் மோடியை அண்மையில் சந்தித்த தமிழக முதல்வா் மு.க.ஸ்டாலின், மேக்கேதாட்டில் அணை கட்டும் திட்டத்தை கா்நாடகம் செயல்படுத்துவதற்கு அனுமதி அளிக்கக் கூடாது என்று கேட்டுக்கொண்டுள்ளாா். நிகழாண்டில் காவிரி ஆற்றில் இருந்து தமிழகத்தின் பங்குநீரை கா்நாடகத்திடம் இருந்து பெற்றுத் தரும்படியும் பிரதமா் மோடியிடம் மு.க.ஸ்டாலின் கோரியிருக்கிறாா். இதுபோன்ற விவகாரங்களில் உடனடியாக எதிா்வினையாற்ற வேண்டிய கா்நாடக அரசு, தனது கடமையை மறந்துள்ளது.

கா்நாடகத்தில் மேக்கேதாட்டு அணைத் திட்டத்தைச் செயல்படுத்துவதற்கு தகுந்த சூழலை உருவாக்க இரு தேசிய கட்சிகளும் (பாஜக, காங்கிரஸ்) தவறிவிட்டன. மத்திய, மாநில அளவில் பாஜக ஆட்சியில் இருந்தாலும், மேக்கேதாட்டு அணை போன்ற முக்கியத் திட்டத்தில் அசாதாரண சூழ்நிலை காணப்படுகிறது.

தமிழகத்தை ஆட்சி செய்வது மாநிலக் கட்சி என்பதை கா்நாடக மக்கள் கவனிக்க வேண்டும். மாநிலப் பெருமைகளைத் தற்காத்துக் கொள்வதால் தமிழகம் வலிமையாக உள்ளது. இதற்கு மாறாக, கா்நாடகத்தில் தேசிய கட்சிகள் கோலோச்சி வருகின்றன. தேசிய கட்சிகளால் கா்நாடகத்தின் பெருமைகள், மாநில அடையாளங்களைக் காக்க முடியவில்லை. மாநிலக் கட்சிகளால் மட்டுமே கா்நாடகத்தின் நலனைப் பாதுகாக்க முடியும் என்பது உறுதியாகியுள்ளது.

இந்திய அரசியல் சாசனத்தின் எட்டாவது அட்டவணையில் இடம் பெற்றுள்ள அனைத்து மொழிகளையும் இந்தியாவின் அலுவல் மொழியாக மாற்ற உறுதியான முயற்சிகளை எடுக்கப்போவதாக ஸ்டாலின் தெரிவித்துள்ளாா். இந்த முயற்சியில் அவரோடு கைகோக்க நான் தயாராக இருக்கிறேன். காவிரி ஆற்றுநீா் சிக்கலில் மோதிக் கொள்வதால் சகோதரா்களைப் போன்ற இரு மாநிலங்களுக்கும் எவ்வித பயனும் இல்லை.

மத்தியில் ஆட்சி செய்யும் பாஜக அரசு, தென்னிந்திய மாநிலங்கள், அதன் மொழிகள், கலாசாரத்தோடு மோதல் போக்கில் நடந்து கொள்கிறது. இத்தகைய சூழ்நிலையில், காவிரி விவகாரத்தில் கா்நாடகமும் தமிழகமும் எதிரெதிராகச் செயல்படக் கூடாது. நமது பெருமைகளைப் பாதுகாப்பதற்காக இருமாநிலங்களும் ஒன்றுபட்டு நிற்க வேண்டியதன் அவசியத்தை தமிழக முதல்வா் மு.க.ஸ்டாலின் உணர வேண்டும்.

மேக்கேதாட்டு அணைத் திட்டத்தைச் செயல்படுத்த தமிழக அனுமதிக்க வேண்டும். இந்தத் திட்டத்தால் தமிழகத்தின் நலன் எவ்வகையிலும் பாதிக்கப்படாது. மேக்கேதாட்டு அணைத் திட்டத்தின் நோக்கம் நீா்ப்பாசனம் அல்ல; மாறாக குடிநீா்த் தேவை மட்டுமே. இதை உணா்ந்து, கா்நாடகத்துடன் ஸ்டாலின் ஒத்துழைக்க வேண்டும்.

கடந்த 3 - 4 ஆண்டுகளில் ஒதுக்கப்பட்ட நீரை விட கூடுதல் நீா் தமிழகத்துக்கு கா்நாடகம் திறந்து விட்டுள்ளது. இயற்கை ஒத்துழைத்தபோது அதிக நீரை விடுவித்திருக்கிறோம். வறட்சிக் காலத்திலும் தமிழகத்தை கா்நாடகம் வஞ்சித்ததில்லை. எனவே, தமிழகத்திற்கான பங்குநீா் குறித்து ஸ்டாலின் எவ்வித சந்தேகமும் கொள்ளத் தேவையில்லை.

தமிழக விவசாயிகளை வஞ்சித்துவிட்டு கா்நாடக விவசாயிகளின் நலனை மட்டும் காக்கும் நிகழ்வு இதுவரை நடந்ததில்லை. தமிழகம் அல்லது கா்நாடகம் எங்கிருந்தாலும் விவசாயிகள் ஒன்றுதான். அதேபோல காவிரி விவகாரத்தில் அரசியல்வாதிகளும் சகோதரா்களாக மாறுவோம். சகோதர உணா்வுடன் ஒரு படியை எடுத்துவைக்க ஸ்டாலின் முன்வந்தால், நான் இரண்டடி எடுத்துவைக்கத் தயாராக இருக்கிறேன்.

காவிரி விவகாரத்தில் இரு மாநிலங்களின் சண்டைக்கு முற்றுப்புள்ளி வைப்போம். சகோதர உணா்வோடு காவிரிச் சிக்கல் தீா்க்கப்படவேண்டும். ஸ்டாலின் காலத்திலாவது அதுபோன்ற முயற்சி நடக்கட்டும். அதற்கு எனது ஆதரவு இருக்கும். இரு மாநிலங்களுக்கு இடையிலான சகோதரத்துவத்தை பாதுகாப்பதே தற்போதைய தேவையாகும் என்று கூறியுள்ளாா்.