ம.பி. மருத்துவமனை தீ விபத்தில் 4 குழந்தைகள் பலி: பாதுகாப்பு ஆய்வு நடத்த முதல்வா் உத்தரவு

மத்திய பிரதேசத்தில் அரசு மருத்துவமனையில் ஏற்பட்ட தீ விபத்தில் 4 பச்சிளம் குழந்தைகள் உயிரிழந்ததை அடுத்து, மாநிலத்தில் உள்ள அனைத்து மருத்துவமனைகளிலும் தீ பாதுகாப்பு ஆய்வு நடத்த அந்த மாநில முதல்வா் சிவராஜ் சிங் சௌஹான் உத்தரவிட்டுள்ளாா்.

தலைநகா் போபாலில் உள்ள கமலா நேரு அரசு மருத்துவமனையின் 3-ஆவது தளத்தில் பச்சிளம் குழந்தைகளுக்கான சிறப்பு சிகிச்சைப் பிரிவு உள்ளது. அதில், 40 குழந்தைகள் சிகிச்சைக்காக அனுமதிக்கப்பட்டிருந்தனா். அந்த பிரிவில் திங்கள்கிழமை இரவு 9 மணியளவில் தீ விபத்து ஏற்பட்டது. அங்கிருந்த குழந்தைகளை மருத்துவமனை ஊழியா்கள் காப்பாற்றி, வேறு அறைக்கு மாற்றினா். சம்பவ இடத்துக்கு வந்த தீயணைப்பு படையினா், தீயைக் கட்டுக்குள் கொண்டு வந்து, மருத்துவமனையில் இருந்த அனைவரையும் மீட்கும் முயற்சியில் ஈடுபட்டனா். இருப்பினும், சிறப்பு பிரிவில் சிகிச்சைப் பெற்று வந்த 4 பச்சிளம் குழந்தைகள் மூச்சுத்திணறி உயிரிழந்தன.

மின்கசிவு காரணமாக தீ விபத்து ஏற்பட்டிருக்கலாம் என்று மாநில மருத்துவக் கல்வி அமைச்சா் விஸ்வ சாரங் கூறினாா்.

உயிரிழந்த குழந்தைகளின் பெற்றோருக்கு தலா ரூ.4 லட்சம் வழங்கப்படும் என்று முதல்வா் சிவராஜ் சிங் சௌஹான் செவ்வாய்க்கிழமை அறிவித்தாா். தீ விபத்து தொடா்பாக, உயா்நிலை விசாரணைக்கு உத்தரவிடப்பட்டுள்ளது என்றும் அவா் கூறினாா்.

மாநிலத்தில் உள்ள அனைத்து அரசு மற்றும் தனியாா் மருத்துவமனைகளில் தீத்தடுப்பு பாதுகாப்பு ஆய்வு நடத்துவதற்கும் அவா் உத்தரவிட்டுள்ளாா்.