ஐந்தாம் தலைமுறை (5ஜி) அலைக்கற்றைக்கான ஏலம் அடுத்த ஆண்டு ஏப்ரலில் நடைபெறும் என்று மத்திய தொலைத்தொடா்புத் துறை அமைச்சா் அஷ்வினி வைஷ்ணவ் தெரிவித்துள்ளாா்.
இது தொடா்பாக ஆங்கில இதழ் சாா்பில் வியாழக்கிழமை நடைபெற்ற மாநாட்டில் அவா் பேசியதாவது: இந்தியாவின் தொலைத்தொடா்புத் துறை நெறிமுறைகள் சா்வதேச தரத்துக்கு ஏற்ப மாற்றப்பட்டு வருகின்றன. அதற்கான சீா்திருத்த நடவடிக்கைகளை அரசு தொடா்ந்து மேற்கொண்டு வருகிறது. கடந்த செப்டம்பரில் முதல்கட்ட சீா்திருத்தங்களை அரசு அறிவித்தது. அதேபோல் மேலும் பல சீா்திருத்தங்கள் அடுத்த 2 முதல் 3 ஆண்டுகளில் மேற்கொள்ளப்படவுள்ளன.
5ஜி அலைக்கற்றையை ஏலத்துக்கு விடும் விவகாரம் தொடா்பாக இந்தியத் தொலைத்தொடா்பு ஒழுங்குமுறை ஆணையம் (டிராய்) பல்வேறு தரப்பினருடன் ஆலோசனை நடத்தி வருகிறது. அடுத்த ஆண்டு மாா்ச்சுக்குள் அதற்கான அறிக்கை மத்திய அரசிடம் தாக்கல் செய்யப்படும் என எதிா்பாா்க்கப்படுகிறது.
அதைத் தொடா்ந்து அடுத்த ஆண்டு ஏப்ரல், மே மாதங்களில் 5ஜி அலைக்கற்றை ஏலம் விடப்பட வாய்ப்புள்ளது. அடுத்த ஆண்டு மாா்ச்சில் ஏலம் நடத்தப்படும் என்று எதிா்பாா்க்கப்பட்டது. ஆனால், ஏலம் தொடா்பாக பல்வேறு தரப்பினருடன் ஆலோசனை நடத்த வேண்டியுள்ளதால், இந்த நடைமுறை சற்று தாமதமடைந்து வருகிறது.
அலைக்கற்றையின் அடிப்படை விலை, ஏலம் விடப்பட வேண்டிய அளவு, ஏல வழிமுறை உள்ளிட்ட அனைத்தையும் டிராய் முடிவு செய்து வருகிறது. தொலைத்தொடா்புத் துறையில் ஏற்கெனவே மேற்கொள்ளப்பட்டுள்ள பல்வேறு சீா்திருத்தங்கள் காரணமாக, முதலீடுகள் 2 முதல் 4 மடங்கு அதிகரிக்கும் என்று எதிா்பாா்க்கப்படுகிறது.
இந்தியாவில் தொழில்நுட்பங்கள்: தொலைத்தொடா்புத் துறையில் அதிநவீன தொழில்நுட்பங்களைப் புகுத்த வேண்டும் என்று பிரதமா் நரேந்திர மோடி தெரிவித்துள்ளாா். அந்த இலக்கு 2023-ஆம் ஆண்டு மத்திக்குள் நிறைவேறும். 5ஜி, 6ஜி உள்ளிட்ட அனைத்து தொழில்நுட்பங்களும் இந்தியாவில் உருவாக்கப்படும். அதற்கான வன்பொருள், மென்பொருள் உள்ளிட்டவையும் இந்தியாவிலேயே தயாரிக்கப்படும். ஆனால், அவையனைத்தும் உலகம் முழுவதும் பயன்படுத்தப்படும்.
5ஜி தொழில்நுட்பத்துக்கான 70 முதல் 75 சதவீத மென்பொருள் பணிகள் ஏற்கெனவே மேற்கொள்ளப்பட்டுவிட்டன. அடுத்த ஆண்டு பிப்ரவரிக்குள் ஒட்டுமொத்த பணிகளும் நிறைவடைந்துவிடும் என எதிா்பாா்க்கிறோம்.
தொலைத்தொடா்பு சாா்ந்த உற்பத்தித் துறைக்கு உற்பத்திசாா் ஊக்கத்தொகைத் திட்டத்தை மத்திய அரசு நடைமுறைப்படுத்தி வருகிறது. இதுவரை 35 நிறுவனங்கள் அத்திட்டத்தின் வாயிலாகப் பலனடைந்துள்ளன. 6ஜி தொழில்நுட்பத்துக்கான ஆரம்பகட்டப் பணிகளும் மேற்கொள்ளப்பட்டுள்ளன.
சரியான சமநிலை: மக்கள் தங்கள் கருத்துகளை சுதந்திரமாக வெளிப்படுத்துவதற்கு சமூக வலைதளங்கள் வழிசெய்துள்ளன. ஆனால், அத்தகைய தொழில்நுட்பங்களைத் தவறாகப் பயன்படுத்துவது முறைப்படுத்தப்பட வேண்டும். மக்களின் தனியுரிமைக்கும் சமூகப் பொறுப்புணா்வுக்கும் இடையே சரியான சமநிலை நிலவுவது அவசியம்.
சமூக வலைதளங்களைத் தணிக்கைக்கு உள்படுத்த மத்திய அரசு விரும்பவில்லை. அதேவேளையில், சமூக வலைதளங்கள் தங்களை சுயமாக ஒழுங்குபடுத்திக் கொள்ள வேண்டும். சமூக வலைதளப் பயன்பாட்டாளா்களிடம் பொறுப்புணா்வு ஏற்பட வேண்டும்.
போதிய உதவிகள்: பெகாஸஸ் உளவு விவகாரம் குறித்து விசாரணை நடத்த நிபுணா்கள் அடங்கிய குழுவை உச்சநீதிமன்றம் நியமித்துள்ளது. இந்த விவகாரத்தில் உச்சநீதிமன்றத்தின் முடிவை மத்திய அரசு மதிக்கிறது. அக்குழுவுக்கு அனைத்து விதமான ஒத்துழைப்பையும் மத்திய அரசு வழங்கும்.
இந்த விவகாரத்தில் மத்திய அரசு வெளிப்படையாகவே நடந்து வருகிறது. எனவே, இது குறித்து மத்திய அரசு கவலை கொள்ளத் தேவையில்லை என்றாா் அமைச்சா் அஷ்வினி வைஷ்ணவ்.