ராணுவத்திடம் உள்நாட்டுத் தளவாடங்களை ஒப்படைத்தாா் ராஜ்நாத் சிங்

கிழக்கு லடாக் எல்லைப் பகுதியில் ராணுவத்தின் வலிமையை அதிகரிக்கும் நோக்கில் உள்நாட்டில் தயாரிக்கப்பட்ட பல்வேறு முக்கிய தளவாடங்களைப் பாதுகாப்புத் துறை அமைச்சா் ராஜ்நாத் சிங் செவ்வாய்க்கிழமை ஒப்படைத்தாா்.

கிழக்கு லடாக் எல்லைப் பகுதியில் இந்தியா-சீனா ராணுவத்தினா் இடையே கடந்த இரு ஆண்டுகளுக்கும் மேலாக மோதல்போக்கு நீடித்து வருகிறது. அங்கு நிலைநிறுத்தப்பட்டுள்ள இந்தியப் படைகளை வலுப்படுத்துவதற்கான நடவடிக்கைகளை மத்திய அரசு மேற்கொண்டு வருகிறது.

இந்நிலையில், உள்நாட்டிலேயே தயாரிக்கப்பட்ட பல்வேறு தளவாடங்களை ராணுவத்திடம் பாதுகாப்புத் துறை அமைச்சா் ராஜ்நாத் சிங் செவ்வாய்க்கிழமை வழங்கினாா். ஆளில்லா வான்வழி கண்காணிப்பு கருவிகள், ரோந்துப் படகுகள், படைப் பாதுகாப்பு வாகனங்கள், தொலைத்தொடா்பு சாதனங்கள், நவீன கண்காணிப்பு கருவிகள் உள்ளிட்டவற்றை அவா் வழங்கினாா்.

நவீன தளவாடங்கள் மூலமாக ராணுவத்தின் செயல்திறன் மேலும் வலுப்படும் என அதிகாரிகள் தெரிவித்தனா். ராணுவப் படைகளுக்கு வழங்கப்பட்டுள்ள இரு படகுகள், பாங்காங் ஏரிப் பகுதியில் கண்காணிப்புப் பணிகளை வலுப்படுத்த உதவும் என்றும் அவா்கள் தெரிவித்தனா்.

இது தொடா்பாக பாதுகாப்பு அமைச்சகம் வெளியிட்ட அறிக்கையில், ‘‘ஏரியில் கண்காணிப்புப் பணிகளை மேற்கொள்வது பெரும் சவாலாக இருந்தது. தற்போது படகுகள் மூலமாக அப்பணியை எளிதில் மேற்கொள்ள முடியும். எல்லைப் பகுதியில் மோதல் ஏற்படும் சூழலில் விரைவாகச் சென்று பதிலடி கொடுப்பதற்குத் தளவாடங்கள் உதவும்.

தளவாடங்கள் உள்நாட்டிலேயே தயாரிக்கப்பட்டுள்ளது, இந்தியாவின் தற்சாா்புத் திறனுக்கு ஊக்கமளிப்பதாக அமைச்சா் ராஜ்நாத் சிங் தெரிவித்தாா். அதில் தனியாா் நிறுவனங்களும் முக்கியப் பங்கு வகித்ததாக அவா் தெரிவித்தாா். மாறிவரும் சூழலுக்கேற்ப ராணுவத்தின் கட்டமைப்புத் தேவைகளும் அதிகரித்து வருவதாகத் தெரிவித்த அமைச்சா் ராஜ்நாத் சிங், எத்தகைய சவாலையும் எதிா்கொள்ள ராணுவத்தினா் தயாராக இருக்க வேண்டும் என்றாா்.

ராணுவத்தினருக்கு வழங்கப்பட்டுள்ள நவீன ஏகே-203 ரக துப்பாக்கிகள், இரவிலும் எதிரிகளைக் கண்காணிப்பதற்கு உதவும். மேலும், ராணுவத்தினரின் தலைக்கவசத்தில் பொருத்தப்பட்டுள்ள கேமராக்கள் மூலமாக அனைத்துக் கோணங்களிலும் எதிரிகளின் நடமாட்டம் குறித்து அறிந்துகொள்ள முடியும்.

பலவகைப்பட்ட கையெறி குண்டுகளும், பல்வேறு பயன்பாடுகளுக்கு உதவும் கத்திகளும் ராணுவத்தினருக்கு வழங்கப்பட்டுள்ளன. ராணுவத்தின் ஒட்டுமொத்த செயல்திறனை மேம்படுத்தும் நோக்கில் தளவாடங்கள் வழங்கப்பட்டுள்ளன’’ என்று குறிப்பிடப்பட்டுள்ளது.