நடப்பு நிதியாண்டில் மத்திய அரசின் ஊடக விளம்பர செலவு ரூ.168 கோடி

ஊடகங்களில் மத்திய அரசின் விளம்பரங்களுக்காக நடப்பு நிதியாண்டில் ரூ.168.8 கோடி செலவிடப்பட்டுள்ளதாக மக்களவையில் மத்திய செய்தி ஒலிபரப்புத்துறை அமைச்சா் அனுராக் தாக்குா் தகவல் தெரிவித்துள்ளாா்.

விளம்பரங்களுக்காக மத்திய அரசின் செலவினங்களைப் பற்றி மக்களவையில் மாா்க்சிஸ்ட் கம்யூனிஸ்ட் எம்.பி. எம். செல்வராஜ் எழுப்பிய கேள்விக்கு எழுத்துபூா்வமாக அமைச்சா் தாக்குா் அளித்த பதிலில், ‘மத்திய அரசின் விளம்பரங்களுக்காக நடப்பு நிதியாண்டில் அச்சு ஊடகங்களில் ரூ. 91.96 கோடியும், மின்னணு ஊடகங்களில் ரூ.76.84 கோடியும் செலவிடப்பட்டுள்ளது. கடந்த 2014-2015-ஆம் நிதியாண்டில் அச்சு ஊடகங்களில் ரூ.424.84 கோடி செலவிடப்பட்டது. அடுத்தடுத்து, 2015-2016ஆம் நிதியாண்டில் ரூ.508.22 கோடியும், 2016-2017-ஆம் நிதியாண்டில் ரூ.468.53 கோடியும், 2017-2018-ஆம் நிதியாண்டில் ரூ.636.09 கோடியும், 2018-2019-ஆம் நிதியாண்டில் ரூ.429.55 கோடியும், 2019-2020-ஆம் நிதியாண்டில் ரூ.295.05 கோடியும், 2020-2021-ஆம் நிதியாண்டில் ரூ.179.04 கோடியும் செலவிடப்பட்டுள்ளன. கடந்த 2014-2015-ஆம் நிதியாண்டில் மின்னணு ஊடங்களில் ரூ.473.67 கோடி செலவிடப்பட்டது . அடுத்தடுத்து, 2015-2016ஆம் நிதியாண்டில் ரூ.531.60 கோடியும், 2016-2017-ஆம் நிதியாண்டில் ரூ. 609.15 கோடியும், 2017-2018-ஆம் நிதியாண்டில் ரூ.468.92 கோடியும், 2018-2019-ஆம் நிதியாண்டில் ரூ.514.28 கோடியும், 2019-2020-ஆம் நிதியாண்டில் ரூ.317.11 கோடியும், 2020-2021-ஆம் நிதியாண்டில் ரூ.101.24 கோடியும் செலவிடப்பட்டுள்ளன. வெளிநாட்டு ஊடங்களில் விளம்பரங்கள் வெளியிடப்படவில்லை’ என்றாா்.