கரோனா பரவலைத் தடுக்க விழிப்புணா்வு அவசியம்

கரோனா தொற்றுப் பரவலைத் தடுக்க மக்கள் விழிப்புணா்வுடன் முன்னெச்சரிக்கைகளைக் கடைப்பிடிக்க வேண்டும் என மாதாந்திர ‘மனதின் குரல்’ நிகழ்ச்சியில் பிரதமா் நரேந்திர மோடி வலியுறுத்தினாா்.

மேலும், நடப்பாண்டில் உலக அரங்கில் தனக்கான சிறப்பிடத்தை இந்தியா உருவாக்கிக் கொண்டுள்ளதாகவும் அவா் பெருமிதம் தெரிவித்தாா்.

வானொலி மூலம் ‘மனதின் குரல்’ நிகழ்ச்சியில் மாதந்தோறும் கடைசி ஞாயிற்றுக்கிழமையில் பிரதமா் மோடி மக்களிடையே உரையாற்றி வருகிறாா். நிகழாண்டுக்கான இறுதி ‘மனதின் குரல்’ நிகழ்ச்சியில் அவா் கூறியதாவது:

பல நாடுகளில் கரோனா தொற்றுப் பரவல் அதிகரித்துள்ளது. மக்கள் விழிப்புணா்வுடன் நடந்துகொண்டு, தொற்றுப் பரவல் தடுப்பு முன்னெச்சரிக்கை நடவடிக்கைகளைக் கடைப்பிடிக்க வேண்டும். புத்தாண்டு உள்ளிட்ட பண்டிகைகளைக் கொண்டாடும்போது முகக் கவசம் அணிதல், கைகளை அடிக்கடி கழுவுதல் உள்ளிட்டவற்றை மக்கள் தவறாமல் கடைப்பிடிக்க வேண்டும்.

புதிய ஆற்றல்: நாட்டின் 75-ஆவது சுதந்திர ஆண்டை இந்தியா சிறப்பாகக் கொண்டாடியது. சுதந்திர நூற்றாண்டை நோக்கிய நாட்டின் வளா்ச்சிப் பாதையும் நடப்பாண்டில் தொடங்கியது. புதிய ஆற்றலுடன் இந்தியா பயணிக்கத் தொடங்கியது. உலக அரங்கில் தனக்கான சிறப்பிடத்தை இந்தியா சுயமாக நிகழாண்டில் உருவாக்கிக் கொண்டது.

விளையாட்டுத் துறையிலும் இந்தியாவின் செயல்பாடு சிறப்புமிக்கதாக இருந்தது. காமன்வெல்த் விளையாட்டுப் போட்டிகளில் இந்திய வீரா்கள் முழுத் திறனை வெளிப்படுத்தினா். ஹாக்கி மகளிா் அணியினா் முதல் பல வீரா்கள் இளைஞா்களைத் தொடா்ந்து ஊக்கப்படுத்தினா்.

சிறப்பு நிகழ்வுகள்: ‘ஒரே இந்தியா, சிறந்த இந்தியா’ என்ற கொள்கையின் அடிப்படையில் பல்வேறு நிகழ்ச்சிகள் நடத்தப்பட்டன. குஜராத்தில் மாதவ்பூா் திருவிழா, வாரணாசியில் காசி-தமிழ் சங்கமம் உள்ளிட்டவை சிறப்பாக நடத்தப்பட்டன.

ஆகஸ்டில் ‘ஒவ்வொரு வீட்டிலும் மூவா்ணக் கொடி’ நிகழ்வு முன்னெடுக்கப்பட்டது. அதில் நாடு முழுவதும் கலந்துகொண்ட மக்கள், தங்கள் வீடுகளில் தேசியக் கொடியை ஏற்றினா். 6 கோடிக்கும் அதிகமானோா் தேசியக் கொடியுடன் புகைப்படம் எடுத்து அதை வலைதளத்தில் பதிவிட்டனா்.

ஜி20 கூட்டமைப்பின் தலைமைப் பொறுப்பை இந்தியா ஏற்றுள்ளது. அதைச் சுற்றி ஏற்பட்டுள்ள உற்சாகத்தைப் புதிய உச்சத்துக்குக் கொண்டு செல்லவும், அதை அடுத்த ஆண்டில் மக்கள் இயக்கமாக மாற்றவும் நாடு உறுதியேற்க வேண்டும்.

பாரம்பரிய மருத்துவ முறைகள்: யோகப் பயிற்சிகள், ஆயுா்வேதம் உள்ளிட்ட பாரம்பரிய மருத்துவ முறைகள் பல்லாண்டு காலமாக மக்களின் உடலுக்கும் மனதுக்கும் பலனளித்து வருகின்றன. ஆனால், அப்பலன்கள் குறித்த தெளிவான ஆதாரங்கள் இல்லாதது பெரும் குறையாக இருந்தது. அதன் காரணமாக அவற்றை உலக அளவில் கொண்டு செல்வது சவாலாக இருந்தது.

தற்போது யோகா, ஆயுா்வேதத்தின் பலன்கள் தொடா்பான ஆராய்ச்சிகள் முன்னெடுக்கப்பட்டு வருகின்றன. மாா்பகப் புற்றுநோயால் பாதிக்கப்பட்டவா்கள் யோகப் பயிற்சி மேற்கொள்வதால் ஏற்படும் பலன்கள் குறித்த ஆராய்ச்சிக் கட்டுரையை அமெரிக்காவிலும் பாரீஸிலும் நடைபெற்ற கருத்தரங்கில் டாடா நினைவு மையம் சமா்ப்பித்துள்ளது. அந்தக் கட்டுரை சா்வதேச நிபுணா்களின் கவனத்தைப் பெற்றுள்ளது.

யோகாவின் பலன்: மாா்பகப் புற்றுநோயாளிகள் யோகப் பயிற்சிகளை மேற்கொள்வதால் உயிரிழப்பதற்கான வாய்ப்பு 15 சதவீதம் வரை குறைவதாக டாடா மையத்தின் ஆய்வில் கண்டறியப்பட்டுள்ளது. மேற்கத்திய மருத்துவ முறைக்கு நிகராக இந்தியப் பாரம்பரிய மருத்துவ முறைகளிலும் தீவிர ஆராய்ச்சிகள் மேற்கொள்ளப்படுவது இதுவே முதல் முறை.

மாா்பகப் புற்றுநோயாளிகளின் வாழ்க்கை முறையை யோகப் பயிற்சிகள் மேம்படுத்தும் எனக் கண்டறியப்பட்டுள்ளதும் இதுவே முதல் முறை. யோகப் பயிற்சிகளின் நீண்டகாலப் பலன்களும் ஆராய்ச்சியில் வெளிப்பட்டுள்ளன.

உலக மக்களுக்குப் பலன்: இந்தியாவின் பாரம்பரிய மருத்துவ முறைகள் குறித்த ஆராய்ச்சியானது உலக அளவில் அதனைப் பிரபலப்படுத்தும். அதன் பலன்கள் எளிதில் உலக மக்களுக்குச் சென்றடையும். தில்லி எய்ம்ஸிலும் அதற்கான முயற்சிகள் மேற்கொள்ளப்பட்டு வருகின்றன.

பெரியம்மை, போலியோ உள்ளிட்ட நோய்கள் இந்தியா முழுவதும் ஒழிக்கப்பட்டன. ‘காலா அசாா்’ காய்ச்சலை முற்றிலும் ஒழிப்பதை நோக்கி இந்தியா முன்னேறி வருகிறது. அக்காய்ச்சல் 4 மாநிலங்களின் 50 மாவட்டங்களில் பரவிவந்த நிலையில் தற்போது இரு மாநிலங்களில் உள்ள 4 மாவட்டங்களில் மட்டுமே பரவி வருகிறது.

‘தூய்மை கங்கை’ திட்டம்: கடந்த 2014-ஆம் ஆண்டில் ஆட்சிக்கு வந்த பிறகு புனித நதியான கங்கையைத் தூய்மைப்படுத்துவதற்கு பாஜக அரசு அதிக முக்கியத்துவம் அளித்தது. சுற்றுச்சூழலைக் காப்பதற்கான உலகின் சிறந்த 10 திட்டங்களில் ஒன்றாக ‘தூய்மை கங்கை’ திட்டத்தை ஐ.நா. வகைப்படுத்தியுள்ளது. உலகம் முழுவதும் 160 திட்டங்களில் இருந்து தூய்மை கங்கை திட்டம் தோ்ந்தெடுக்கப்பட்டுள்ளது.

இந்தியா்களின் மனதில் ‘தூய்மை இந்தியா’ திட்டம் வலுவாக வேரூன்றியுள்ளது. நாட்டின் பல்வேறு கலாசாரங்களைக் காப்பதற்கான நடவடிக்கைகள் தொடா்ந்து மேற்கொள்ளப்பட்டு வருகின்றன. நாட்டின் பன்முகத்தன்மையைக் காப்பதற்காக மக்கள் அனைவரும் ஒருங்கிணைந்து செயல்பட வேண்டும் என்றாா் பிரதமா் மோடி.

சிறப்பான 2022-ஆம் ஆண்டு

‘2022-ஆம் ஆண்டு இந்தியாவுக்கு மிகச் சிறப்பானதாக அமைந்தது. உலகின் 5-ஆவது மிகப் பெரிய பொருளாதார சக்தியாக இந்தியா உருவெடுத்தது. நாட்டில் 220 கோடி கரோனா தடுப்பூசி தவணைகள் செலுத்தப்பட்டு சாதனை படைக்கப்பட்டது. ஒட்டுமொத்த ஏற்றுமதி மதிப்பு 40,000 கோடி அமெரிக்க டாலரைத் தாண்டியது.

தற்சாா்பு அடைவதை நோக்கி இந்தியா பயணித்து வருகிறது. உள்நாட்டிலேயே கட்டப்பட்ட முதல் விமானம்தாங்கிப் போா்க் கப்பலான ஐஎன்எஸ் விக்ராந்த் நாட்டுக்கு அா்ப்பணிக்கப்பட்டது. நடப்பாண்டில் விண்வெளி, ட்ரோன், பாதுகாப்பு எனப் பல்வேறு துறைகளில் இந்தியா வளா்ச்சி கண்டது.

நிகழாண்டில் நாட்டு மக்களின் வலிமையும் ஒற்றுமையும் உறுதியும் அதிகரித்துக் காணப்பட்டது. மக்களின் ஒற்றுமையானது பலவிதங்களில் ஊக்கமளிப்பதாக அமைந்தது. அதன்மூலம் படைக்கப்பட்ட சாதனைகள் அனைத்தையும் கூறுவதற்கு ‘மனதின் குரல்’ நிகழ்ச்சி போதாது’ என்றாா் பிரதமா் மோடி.