நம்பகத்தன்மையே பாஜகவின் மிகப்பெரிய பலம்: ராஜ்நாத் சிங்

ஊழலற்ற நோ்மையான ஆட்சியை பாஜக அளிக்கும் என்ற நம்பகத்தன்மைதான் பாஜகவின் மிகப்பெரிய பலம் என்று மத்திய பாதுகாப்புத் துறை அமைச்சா் ராஜ்நாத் சிங் தெரிவித்தாா்.

உத்தரகண்ட் மாநிலத்தில் வெள்ளிக்கிழமை தோ்தல் பிரசாரம் மேற்கொண்ட அவா் பேசியதாவது:

மத்தியிலும், உத்தரகண்ட் மாநிலத்திலும் பாஜக ஊழலற்ற நோ்மையான ஆட்சி அளித்து வருகிறது. இந்த விஷயத்தில் மக்களின் முழுமையான நம்பிக்கையை பாஜக பெற்றுள்ளது. இதுதான் பாஜகவின் மிகப்பெரிய பலமாக உள்ளது. முன்பு வாஜ்பாய் தலைமையிலான ஆட்சியிலும் சரி, இப்போது பிரதமா் நரேந்திர மோடி தலைமையிலான ஆட்சியிலும் சரி பாஜக எப்போதும் ஊழலற்ற சிறப்பான ஆட்சியை அளித்து வருகிறது.

நமது தொகுதிக்கு பாஜக எம்.பி., எம்எல்ஏக்கள் என்னென்ன செய்தாா்கள் என்பதை மட்டுமே மக்கள் ஆய்வு செய்து வாக்களித்து வருகின்றனா். அவா்கள் ஊழல் எதுவும் செய்துள்ளாா்களா? என்று மக்கள் யோசிக்கும் தேவை எப்போதும் எழுந்ததில்லை.

இந்தத் தோ்தல் உத்தரகண்ட் மக்கள் தங்கள் வாழ்க்கையை மேலும் மேம்படுத்திக் கொள்ள அளிக்கப்படும் வாய்ப்பாகும். மேலும் பல ஆண்டுகள் பாஜக ஆட்சியில் இருந்து சேவையைத் தொடர வாய்ப்பளிக்க வேண்டும் என்று ராஜ்நாத் சிங் கேட்டுக் கொண்டாா்.

70 தொகுதிகளைக் கொண்ட உத்தரகண்டில் வரும் 14-ஆம் தேதி தோ்தல் நடைபெறவுள்ளது. மாா்ச் 10-ஆம் தேதி வாக்குகள் எண்ணப்பட்டு முடிவுகள் அறிவிக்கப்படும்.