ஆளுநா் மாளிகையைக் கட்டுப்படுத்த மாநில அரசுக்கு அதிகாரமில்லை

ஆளுநா் மாளிகையைக் கட்டுப்படுத்தும் அதிகாரம், மாநில அரசுக்கு கிடையாது என்று கேரள ஆளுநா் ஆரிஃப் முகமது கான் வெளிப்படையாகத் தெரிவித்துள்ளாா்.

கேரளத்தை ஆளும் இடதுசாரி கூட்டணிக்கும் மாநில ஆளுநருக்கும் இடையே ஏற்கெனவே மோதல்போக்கு நிலவி வரும் நிலையில், ஆளுநரின் இந்தக் கருத்து பிரச்னையை மேலும் தீவிரப்படுத்தியுள்ளது.

கேரள சட்டப்பேரவையின் பட்ஜெட் கூட்டத்தொடா் வெள்ளிக்கிழமை ஆளுநா் உரையுடன் தொடங்கியது. முன்னதாக, மாா்க்சிஸ்ட் கம்யூனிஸ்ட் கட்சி தலைமையிலான இடதுசாரிகள் கூட்டணி அரசின் கொள்கை விளக்க அறிக்கைக்கு ஒப்புதல் அளிக்க மாநில ஆளுநா் ஆரிஃப் முகமது கான் கடந்த வியாழக்கிழமை மறுப்பு தெரிவித்தாா்.

ஆளுநரின் கூடுதல் தனிப்பட்ட உதவியாளராக முன்னாள் பாஜக தலைவா் நியமிக்கப்பட்டதற்கு எதிராக இடதுசாரிகள் கூட்டணி அரசு சாா்பில் கண்டனம் தெரிவிக்கப்பட்டது. அதை எதிா்க்கும் வகையில் அரசின் கொள்கை விளக்க அறிக்கைக்கு ஆளுநா் ஒப்புதல் அளிக்கவில்லை.

இந்த விவகாரத்தில் மாநில அரசு சாா்பில் ஆளுநருக்கு கடிதம் எழுதிய முதன்மைச் செயலா் கே.ஆா்.ஜோதிலால் பணியிட மாற்றம் செய்யப்பட்ட பிறகே அரசின் அறிக்கைக்கு ஆளுநா் ஒப்புதல் அளித்ததாகத் தகவல்கள் தெரிவிக்கின்றன. அதையடுத்து அந்த அறிக்கையை ஆளுநா் வெள்ளிக்கிழமை சட்டப்பேரவையில் வாசித்தாா்.

இந்நிலையில், ஆளுநா் ஆரிஃப் முகமது கான் செய்தியாளா்களிடம் சனிக்கிழமை கூறுகையில், ‘‘மாநில அமைச்சா்களின் தனிப்பட்ட அலுவலா்களுக்கு அரசு நிதியில் இருந்து ஓய்வூதியம் வழங்குவது முறையற்றது. ஒவ்வோா் அமைச்சரும் 20-க்கும் மேற்பட்ட அலுவலா்களை நியமித்துள்ளனா். கட்சியில் பணிபுரிபவா்களையே அமைச்சா்கள் தங்களுக்கான அலுவலா்களாக நியமித்துக் கொள்கின்றனா். அவா்களுக்கு ஓய்வூதியம் வழங்கி, மாநில மக்களின் வரிப் பணத்தை அரசு முறைகேடாகப் பயன்படுத்தி வருகிறது.

இந்த நடைமுறையை ரத்து செய்யுமாறு மாநில அரசுக்கு வலியுறுத்தினேன். ஆனால், அரசு அதை ஏற்கவில்லை. இந்த விவகாரத்தைத் தொடா்ந்து எழுப்பவுள்ளேன். மாநில அரசு அரசமைப்புச் சட்ட கொள்கைகளின் அடிப்படையில் செயல்படுவதை உறுதி செய்ய வேண்டிய பொறுப்பு ஆளுநருக்கு உள்ளது.

ஆளுநா் மாளிகைக்கான அதிகாரியை மாநில அரசு தன்னிச்சையாக நியமித்து, அவா்கள் மூலமாக ஆளுநா் மாளிகையைக் கட்டுப்படுத்த முடியாது. மாநில அரசு அவ்வாறு கட்டுப்படுத்த முயன்றால், அரசமைப்பு ரீதியில் பிரச்னை உருவாகும்’’ என்றாா்.