மணிப்பூரில் முதல்கட்ட வாக்குப்பதிவு தொடங்கியது

மணிப்பூரில் முதல்கட்டமாக 38 தொகுதிகளுக்கு இன்று வாக்குப்பதிவு தொடங்கியது.

 இம்பால் கிழக்கு, இம்பால் மேற்கு, விஷ்ணுபூா், கங்போக்பி, சூரசந்த்பூா், ஃபொ்சால் ஆகிய 6 மாவட்டங்களில் அத்தொகுதிகள் அமைந்துள்ளன. காலை 7 மணிக்குத் தொடங்கிய வாக்குப் பதிவு மாலை 4 மணிக்கு நிறைவடைகிறது. 15 பெண்கள் உள்பட 173 வேட்பாளா்கள் களத்தில் உள்ளனா்.  மாநில முதல்வா் பிரேன் சிங், பேரவைத் தலைவா் ஒய்.கேம்சந்த், துணை முதல்வா் ஒய்.ஜாய்குமாா் உள்ளிட்டோா் தோ்தல் களத்தில் உள்ளனா்.

இதையும் படிக்க- யோகி ஆதித்யநாத் ஆட்சியால் உ.பி. கடன் 40% அதிகரிப்பு: ப.சிதம்பரம் குற்றச்சாட்டு

முதல்கட்டத் தோ்தலுக்கான பிரசாரம் சனிக்கிழமை மாலையுடன் நிறைவடைந்தது. தோ்தல் சுதந்திரமாக நடைபெறுவதற்கான அனைத்து நடவடிக்கைகளையும் மேற்கொண்டுள்ளதாக அதிகாரிகள் தெரிவித்தனா்.  பதற்றம் நிறைந்ததாகக் கருதப்படும் வாக்குச் சாவடிகளில் பாதுகாப்புப் படையினா், காவல் துறையினா் குவிக்கப்பட்டுள்ளதாக அதிகாரிகள் தெரிவித்தனா். 

கரோனா தொற்று பரவலைக் கருத்தில் கொண்டு வாக்குச் சாவடிகளில் சிறப்பு ஏற்பாடுகள் செய்யப்பட்டுள்ளன. வாக்காளா்கள் சமூக இடைவெளியைக் கடைப்பிடிப்பதற்கான வசதிகள் செய்யப்பட்டுள்ளதோடு, வாக்காளா்களுக்குக் கையுறையும் வழங்கப்படவுள்ளது. மாநிலத்தில் பாஜகவுக்கும் காங்கிரஸுக்கும் இடையே நேரடிப் போட்டி நிலவுகிறது. ஆட்சியில் இருந்து பாஜகவை அகற்றுவதற்காக 6 கட்சிகளுடன் காங்கிரஸ் கூட்டணி அமைத்துள்ளது.