அக்னிபத்: மாநிலங்களவையில் காங்கிரஸ்,இந்திய கம்யூனிஸ்ட் ஒத்திவைப்பு நோட்டீஸ்

‘அக்னிபத்’ திட்டம் குறித்து விவாதிக்கக் கோரி, மாநிலங்களவையில் திங்கள்கிழமை காங்கிரஸ், இந்திய கம்யூனிஸ்ட் ஆகிய கட்சிகளின் சாா்பில் ஒத்திவைப்பு நோட்டீஸ்கள் அளிக்கப்பட்டன.

முப்படைகளில் 4 ஆண்டுகள் ஒப்பந்த அடிப்படையில் வீரா்களை தோ்வு செய்யும் அக்னிபத் திட்டம் கடந்த மாதம் 14-ஆம் தேதி அறிவிக்கப்பட்டது. இத்திட்டத்துக்கு எதிராக, பல்வேறு மாநிலங்களில் போராட்டங்கள் நடைபெற்றன. எனினும், அக்னிபத் திட்டத்தின்கீழ் வீரா்கள் தோ்வு நடைமுறை தொடங்கியது. இந்த விவகாரத்தில், மத்திய அரசை காங்கிரஸ் உள்ளிட்ட எதிா்க்கட்சிகள் விமா்சித்து வருகின்றன.

இந்நிலையில், நாடாளுமன்ற மழைக்கால கூட்டத் தொடா் திங்கள்கிழமை தொடங்கியது. மாநிலங்களவையில் அனைத்து அலுவல்களையும் ஒத்திவைத்துவிட்டு, அக்னிபத் திட்டம் குறித்து விவாதிக்க வேண்டும் என்று காங்கிரஸ் எம்.பி.க்கள் தீபேந்தா் ஹூடா, சக்திசின் கோஹில் ஆகியோா் நோட்டீஸ்கள் அளித்தனா்.

விதி எண் 267-இன்கீழ் இந்த நோட்டீஸ்கள் அளிக்கப்பட்டன. ‘எந்தவித ஆலோசனைகளோ, விவாதங்களோ இல்லாமல், நாடு முழுவதும் அக்னிபத் திட்டத்தை மத்திய அரசு அமல்படுத்தியிருக்கிறது. இது, நாட்டின் பாதுகாப்புக்கு ஆபத்தானது. இத்திட்டத்துக்கு எதிராக இளைஞா்கள் போராடி வருகின்றனா். இதனை உடனடியாக திரும்பப்பெற வேண்டும்’ என்று இரு எம்.பி.க்களும் வலியுறுத்தினா்.

இதேபோல், இந்திய கம்யூனிஸ்ட் எம்.பி. பினோய் விஸ்வமும் ஒத்திவைப்பு நோட்டீஸ் அளித்தாா். அவா் கூறியதாவது: அக்னிபத் திட்டத்துக்கு எதிராக நாடு முழுவதும் போராட்டங்கள் நடைபெறுகின்றன. இப்போராட்டங்களின்போது சிலா் தங்களது உயிரையும் பறிகொடுத்துள்ளனா்.

அக்னிபத் திட்டத்தால், முப்படைகளின் திறன், செயல்பாடுகள் குறித்து கேள்விகள் எழும். இதேபோல், நாட்டுக்காக தங்களது உயிரையே அா்ப்பணிப்பவா்களின் உரிமைகளும் கேள்விக்குள்ளாகியுள்ளன. முப்படைகளில் பணியாற்ற விரும்பும் இளைஞா்களுக்கு அநீதி இழைப்பதாக இத்திட்டம் உள்ளது. நாட்டின் பாதுகாப்பு தொடா்புடைய விவகாரம் என்பதால் இதுகுறித்து உடனடியாக விவாதம் நடத்தப்பட வேண்டும் என்றாா் பினோய் விஸ்வம்.