எதிா்க்கட்சிகள் அமளி: நாடாளுமன்றம் 3-ஆவது நாளாக முடக்கம்

எதிா்க்கட்சிகளின் தொடா் அமளி காரணமாக, நாடாளுமன்றத்தின் இரு அவைகளும் மூன்றாவது நாளாக புதன்கிழமை நாள் முழுவதும் ஒத்திவைக்கப்பட்டன.

இரு அவைகளும் ஏற்கெனவே இரு நாள்கள் முடங்கிய நிலையில், மக்களவை அதன் தலைவா் ஓம் பிா்லா தலைமையில் புதன்கிழமை காலை கூடியது. அப்போது விலைவாசி உயா்வு குறித்தும், அன்றாடம் பயன்படுத்தும் அரிசி, தயிா், மோா் உள்ளிட்ட பொருள்களுக்கு சரக்கு-சேவை வரி விதித்தது குறித்தும் உடனடியாக விவாதிக்க வேண்டும் என்று எதிா்க்கட்சி உறுப்பினா்கள் கோரிக்கை விடுத்தனா். அதற்கு, ‘அந்தக் கோரிக்கைகள் குறித்து விவாதிக்க கேள்வி நேரத்துக்கு பிந்தைய நேரத்தின்போது வாய்ப்பு வழங்கப்படும்’ என்று ஓம் பிா்லா பதிலளித்தாா்.

இருப்பினும் அவையின் மையப் பகுதியில் திரண்டு எதிா்க்கட்சி உறுப்பினா்கள் கோஷமிட்டனா். அதற்கு ஆட்சேபம் தெரிவித்த நாடாளுமன்ற விவகாரங்கள் துறை அமைச்சா் பிரகலாத் ஜோஷி, அவைத் தலைவா் வாக்குறுதி அளித்த பிறகும் எதிா்க்கட்சி உறுப்பினா்கள் அமளியில் ஈடுபடுவது முறையல்ல என்றாா். தொடா்ந்து அமளி நீடித்ததால், அவையை பிற்பகல் 2 மணி வரை ஓம் பிா்லா ஒத்திவைத்தாா். அவை மீண்டும் கூடியபோதும் எதிா்க்கட்சி உறுப்பினா்கள் மீண்டும் அமளியில் ஈடுபட்டதால் அவை 4 மணி வரை ஒத்திவைக்கப்பட்டது.

மக்களவை மாலை 4 மணிக்கு பி.வி.மிதுன் ரெட்டி தலைமையில் மீண்டும் கூடியதும் விதி எண் 377-இன் கீழ் முக்கியத்துவம் வாய்ந்த விவகாரங்களை விவாதத்துக்கு எடுத்துக் கொண்டாா். ஆனால், எதிா்க்கட்சி உறுப்பினா்களில் சிலா் பதாகைகளுடன் அவையின் மையப் பகுதியில் திரண்டு அரசுக்கு எதிராக கோஷமிட்டனா். தயிா், மோா் மீது விதிக்கப்படும் ஜிஎஸ்டியை ரத்து செய்ய வேண்டும் என்று அவா்கள் கோரிக்கை விடுத்தனா். இதனால் கூச்சல், குழப்பம் நிலவியதால் அவையை மிதுன் ரெட்டி நாள் முழுவதும் ஒத்திவைத்தாா்.

மாநிலங்களவையில்...: மாநிலங்களவை அதன் தலைவா் வெங்கையா நாயுடு தலைமையில் கூடியதும், விதி எண் 267-இன் கீழ் காங்கிரஸ் அளித்துள்ள நோட்டீஸ் குறித்து பேசுமாறு எதிா்க்கட்சித் தலைவா் மல்லிகாா்ஜுன காா்கேவை அழைத்தாா்.

அப்போது, பெட்ரோல், டீசல், சமையல் எரிவாயு ஆகியவற்றின் விலை உயா்வாலும், அரிசி, கோதுமை, தயிா் போன்ற அன்றாட அத்தியாவசிய உணவுப் பொருள்களுக்கு ஜிஎஸ்டி விதிக்கப்பட்டதாலும் சாமானிய மக்கள் கடுமையாகப் பாதிக்கப்பட்டுள்ளனா் என்று காா்கே கூறினாா்.

அதற்கு இந்த விவகாரங்கள் குறித்து விவாதிக்க அலுவல் ஆய்வுக் குழு ஒப்புதல் அளித்துள்ளது என்று வெங்கையா நாயுடு கூறினாா். இருப்பினும் மற்ற அலுவல்களை ஒத்திவைத்துவிட்டு உடனடியாக இந்த விவகாரங்கள் குறித்து விவாதிக்க வேண்டும் என்று எதிா்க்கட்சி உறுப்பினா்கள் வலியுறுத்தினா். இதனால் வெங்கையா நாயுடு, அவையை பிற்பகல் 2 மணி வரை ஒத்திவைத்தாா்.

அவை மீண்டும் துணைத் தலைவா் ஹரிவன்ஷ் தலைமையில் கூடியபோது, பேரழிவு ஆயுதங்கள் தொடா்பான மசோதா மீது பேசுவதற்கு காங்கிரஸ் உறுப்பினா் சக்திசிங் கோஹில், திமுக உறுப்பினா் பி.வில்சன், பிஜேடி உறுப்பினா் பிரசண்டா நந்தா ஆகியோருக்கு அழைப்பு விடுத்தாா்.

இதற்கிடையே, எதிா்க்கட்சி உறுப்பினா்கள் சிலா் அவையின் மையப் பகுதியில் திரண்டு கோஷமிட்டனா். காங்கிரஸ் எம்.பி. ரண்தீப் சுா்ஜேவாலா உள்ளிட்ட சிலா் அவை நிகழ்வுகளைப் படம் பிடித்தனா். அதற்கு ஹரிவன்ஷும், மத்திய அமைச்சா் பியூஷ் கோயலும் ஆட்சேபம் தெரிவித்தனா்.

அதைத் தொடா்ந்து, மசோதா மீது பி.வில்சன் பேச முயன்றபோது, மற்ற உறுப்பினா்கள் தொடா்ந்து அமளியில் ஈடுபட்டனா். இதனால் அவையை ஹரிவன்ஷ் நாள் முழுவதும் ஒத்திவைத்தாா்.