மகளுக்கு சட்டவிரோதமாக ஆசிரியா் பணி: மேற்கு வங்க அமைச்சரிடம் சிபிஐ விசாரணை

மேற்கு வங்கத்தில் அரசு உதவிபெறும் பள்ளியில் ஆசிரியையாக தனது மகளை சட்டவிரோதமாக நியமித்த குற்றச்சாட்டு தொடா்பாக மாநில கல்வி இணையமைச்சா் பரேஷ் சந்திர அதிகாரி சிபிஐ விசாரணைக்கு வெள்ளிக்கிழமை ஆஜரானாா்.

மேற்கு வங்க மாநிலம் கொல்கத்தா உயா்நீதிமன்றத்தில் பபிதா சா்காா் என்ற பெண் தாக்கல் செய்துள்ள மனுவில், ஆசிரியா் தோ்வில் தான் அதிக மதிப்பெண் பெற்றபோதிலும் தனக்கு அந்தப் பணி வழங்கப்படவில்லை என்றும், தன்னைவிட குறைவான மதிப்பெண் பெற்ற அமைச்சா் பரேஷ் சந்திர அதிகாரியின் மகள் அங்கிதா சட்டவிரோதமாக அரசு உதவிபெறும் பள்ளியில் ஆசிரியையாக நியமிக்கப்பட்டதாகவும் குற்றஞ்சாட்டியுள்ளாா். இதுதொடா்பாக சிபிஐ விசாரணைக்கு உத்தரவிட்ட உயா்நீதிமன்றம், அந்த அமைப்பின் விசாரணைக்கு செவ்வாய்க்கிழமை ஆஜராகுமாறு பரேஷ் சந்திர அதிகாரிக்கு உத்தரவிட்டிருந்தது. ஆனால் அவா் விசாரணைக்கு ஆஜராகவில்லை. இந்த வழக்கு வியாழக்கிழமை விசாரணைக்கு வந்தபோது, அன்றைய தினம் பிற்பகல் 3 மணிக்குள் அவா் விசாரணைக்கு ஆஜராக வேண்டும் என்று உயா்நீதிமன்றம் உத்தரவிட்டது. அப்போதும் அவா் விசாரணைக்கு ஆஜராகவில்லை. உயா்நீதிமன்றம் விதித்த காலக்கெடுவுக்குள் விசாரணைக்கு ஆஜராகாததைத் தொடா்ந்து, பரேஷ் சந்திர அதிகாரி மற்றும் அங்கிதா மீது இந்திய தண்டனைச் சட்டத்தின் 420 (ஏமாற்றுதல், நோ்மையின்மை), 120பி (குற்றச் சதி) பிரிவுகள், ஊழல் தடுப்புச் சட்டப் பிரிவுகளின் கீழ் சிபிஐ வழக்குப் பதிவு செய்தது.

இந்நிலையில், கொல்கத்தாவில் உள்ள சிபிஐ அலுவலகத்தில் வெள்ளிக்கிழமை காலை சுமாா் 10.30 மணியளவில் பரேஷ் சந்திர அதிகாரி ஆஜரானாா். அவரிடம் விசாரணை நடத்திய அதிகாரிகள், அவரின் வாக்குமூலத்தைப் பதிவு செய்தனா்.