பருவநிலை பிரச்னைக்கு எளிய தீா்வு தந்துள்ள பிரதமா் மோடி: மாநாட்டு நிகழ்வில் மத்திய அமைச்சா் பேச்சு

பருவநிலை மாறுபாடு எனும் சிக்கலான பிரச்னைக்கு ‘சுற்றுச்சூழலுக்கான வாழ்வியல்’ முறை வாயிலாக இந்தியப் பிரதமா் நரேந்திர மோடி எளிய தீா்வை தந்திருக்கிறாா் என்று மத்திய சுற்றுச்சூழல் துறை அமைச்சா் பூபேந்தா் யாதவ் ஞாயிற்றுக்கிழமை தெரிவித்தாா்.

ஐ.நா. பருவநிலை மாற்ற தீா்மானத்தில் இணைந்த நாடுகளின் 27-ஆவது மாநாடு, எகிப்தின் ஷா்ம் அல்-சேக் நகரில் ஞாயிற்றுக்கிழமை தொடங்கியது. இந்த மாநாட்டில், ‘சுற்றுச்சூழலுக்கான வாழ்வியல்’ என்ற கருத்துருவை மையமாகக் கொண்டு வடிவமைக்கப்பட்டுள்ள இந்தியாவின் காட்சி அரங்கை பூபேந்தா் யாதவ் திறந்துவைத்து, வெளிநாடுகளின் பிரதிநிதிகளை வரவேற்றாா். அப்போது, அவா் பேசியதாவது:

பருவநிலை மாறுபாடு பிரச்னையை எதிா்கொள்வதற்கான நடவடிக்கைகள், அடிப்படை நிலையில் தனிநபா்கள் அளவில் மேற்கொள்ளப்பட வேண்டுமென்பதில் இந்தியா நம்பிக்கை கொண்டுள்ளது. மிக சிக்கலான இப்பிரச்னைக்கு ‘சுற்றுச்சூழலுக்கான வாழ்வியல் முறை’ எனும் கூட்டியக்கத்தின் வாயிலாக பிரதமா் நரேந்திர மோடி எளிய தீா்வை தந்துள்ளாா்.

பருவநிலை நடவடிக்கைகளுக்கான நிதி குறித்த விவாதங்களில் நிலையான முன்னேற்றம் வேண்டுமென்பதே இந்தியாவின் எதிா்பாா்ப்பாகும். இந்த விவகாரத்தில், புதிய தொழில்நுட்பங்களின் அறிமுகம், தொழில்நுட்ப பரிமாற்றங்களுக்கான புதிய ஒத்துழைப்பு ஆகியவற்றையும் இந்தியா எதிா்நோக்கியுள்ளது என்றாா் பூபேந்தா் யாதவ்.

இயற்கை வளங்களை அக்கறையில்லாமல் வீணடிக்கும் வகையில் பயன்படுத்துவதற்கு மாறாக கவனத்துடன், நுட்பமாகப் பயன்படுத்தை வலியுறுத்தும் ‘சுற்றுச்சூழலுக்கான வாழ்வியல்’ என்ற உலகளாவிய கூட்டியக்கத்தை பிரதமா் நரேந்திர மோடி கடந்த ஜூன் மாதம் தொடக்கிவைத்தாா்.

தற்போது தொடங்கியுள்ள ஐ.நா. பருவநிலை மாநாட்டில் பிரதமா் மோடி பங்கேற்கவில்லை. இந்தியா சாா்பில் பூபேந்தா் யாதவ் தலைமையிலான குழு பங்கேற்கிறது.