சவால்மிக்க தருணங்களில் இந்தோனேசியாவுக்கு இந்தியா உறுதுணை: இந்திய சமூகத்தினரிடம் பிரதமர் மோடி

சவால்மிக்க பல்வேறு தருணங்களில் இந்தோனேசியாவுக்கு இந்தியா உறுதுணையாக நின்றுள்ளதாக அந்நாட்டில் வசிக்கும் இந்திய சமூகத்தினரிடம் பிரதமா் நரேந்திர மோடி தெரிவித்தாா்.

ஜி20 மாநாட்டில் பங்கேற்பதற்காக இந்தோனேசியாவுக்குச் சென்றுள்ள பிரதமா் மோடி, பாலி நகரில் இந்திய சமூகத்தினரை செவ்வாய்க்கிழமை சந்தித்துப் பேசினாா். அப்போது அவா் கூறுகையில், ‘இந்தியாவும் இந்தோனேசியாவும் பாரம்பரியத்தையும் கலாசாரத்தையும் பகிா்ந்துகொண்டு வருகின்றன. பல்வேறு சவால்மிக்க தருணங்களில் இந்தோனேசியாவின் உற்ற துணையாக இந்தியா உறுதியுடன் நின்றுள்ளது.

இந்தோனேசியாவில் 2018-ஆம் ஆண்டு ஏற்பட்ட பெரும் நிலநடுக்கம் பேரிழப்புகளை ஏற்படுத்தியபோது, ‘ஆபரேஷன் சமுத்ர மைத்ரி’ என்ற மனிதாபிமான உதவித் திட்டத்தை இந்தியா செயல்படுத்தியது. காலத்தின் சவால்களைக் கடந்து இரு நாடுகளுக்கும் இடையேயான நல்லுறவு தொடா்ந்து வலுவடைந்து வருகிறது.

அயோத்தியில் ராமா் கோயில் கட்டப்பட்டு வருகிறது. இத்தருணத்தில் இந்தோனேசியா கொண்டுள்ள ராமாயணத் தொடா்பை அனைவரும் நினைவுகூர வேண்டும். கடந்த ஆகஸ்ட் 15-ஆம் தேதியில் இந்தியா 75-ஆவது சுதந்திர ஆண்டு நிறைவைக் கொண்டாடியது. அதற்கு இரு நாள்கள் கழித்து (ஆக. 17) இந்தோனேசியா தனது சுதந்திர தினத்தைக் கொண்டாடியது.

உலகின் நம்பிக்கை ஒளி: உலகின் மிக வேகமாக வளரும் பொருளாதாரமாக இந்தியா திகழ்ந்து வருகிறது. 2014-ஆம் ஆண்டுக்குப் பிறகு இந்தியாவின் வளா்ச்சி அபரிமிதமாக உள்ளது. இணையவழி பணப் பரிவா்த்தனைகள், சா்வதேச நிதித் தொழில்நுட்பம், தகவல்-தொழில்நுட்பப் பணிகளின் வெளிமுகமை, அறிதிறன்பேசி இணைய பயன்பாடு, தடுப்பூசி உற்பத்தி உள்ளிட்ட பல்வேறு துறைகளில் இந்தியா முதலிடம் வகித்து வருகிறது. 21-ஆம் நூற்றாண்டுக்கான உலகின் நம்பிக்கை ஒளியாக இந்தியா திகழ்கிறது.

பெரிய இலக்குகளை நிா்ணயித்து இந்தியா வேகமாகப் பயணித்து வருகிறது. திறன், தொழில்நுட்பம், புத்தாக்கம், தொழில்துறை ஆகியவை உலக அளவில் இந்தியாவுக்கு என தனி அடையாளத்தை உருவாக்கியுள்ளன. உலகின் முக்கிய நிறுவனங்கள் பல இந்திய வம்சாவளி நபரை தலைமைச் செயல் அதிகாரியாகக் கொண்டுள்ளன’ என்றாா்.

கலைஞா்களுடன் இணைந்து...: முன்னதாக, பாலி நகரில் இந்திய சமூகத்தினா் கூடியிருந்த அரங்குக்கு வருகை தந்த பிரதமா் மோடிக்கு அங்கிருந்தோா் ஆரவாரத்துடன் உற்சாக வரவேற்பளித்தனா். இசைக் கலைஞா்கள் மேளதாளங்களை முழங்க பிரதமா் மோடிக்கு வரவேற்பு அளித்தனா். அப்போது, இசைக் கலைஞா்களின் பக்கத்தில் சென்ற பிரதமா் மோடி, அவா்கள் வைத்திருந்த மேளங்களை முழக்கினாா்.

ரிஷி சுனக்,  ஷி ஜின்பிங்குடன் மோடி சந்திப்பு

ஜி20 மாநாட்டின்போது பிரிட்டன் பிரதமா் ரிஷி சுனக், பிரான்ஸ் அதிபா் இமானுவல் மேக்ரான் ஆகியோரைப் பிரதமா் மோடி அலுவல்சாரா முறையில் சந்தித்துப் பேசினாா். அவா்களுடன் விரிவான இருதரப்பு பேச்சுவாா்த்தையிலும் பிரதமா் மோடி ஈடுபடவுள்ளாா்.

இந்தோனேசிய அதிபா் ஜோகோ விடோடோ, செனகல் அதிபா் மேக்கி சால், நெதா்லாந்து அதிபா் மாா்க் ரூட்டே உள்ளிட்டோரையும் சந்தித்துப் பேசிய பிரதமா் மோடி, பல்வேறு விவகாரங்கள் குறித்து அவா்களுடன் விவாதித்ததாக பிரதமா் அலுவலகம் சாா்பில் தெரிவிக்கப்பட்டுள்ளது.

பரஸ்பரம் மரியாதை: ஜி20 நாடுகளின் தலைவா்களுக்கு இந்தோனேசிய அதிபா் ஜோகோ விடோடோ செவ்வாய்க்கிழமை இரவு விருந்தளித்தாா். அதில் கலந்துகொண்ட பிரதமா் மோடியும் சீன அதிபா் ஷி ஜின்பிங்கும் பரஸ்பரம் மரியாதை தெரிவிக்கும் வகையில் கைகுலுக்கிக் கொண்டனா்.

கிழக்கு லடாக் எல்லைப் பகுதியில் இந்தியா-சீனா இடையே மோதல்போக்கு நீடித்து வரும் நிலையில், இருநாட்டுத் தலைவா்களின் அதிகாரபூா்வ சந்திப்பு தொடா்பாக இதுவரை உறுதியான தகவல்கள் எதுவும் வெளியிடப்படவில்லை.