தொழில்நுட்பமும் திறமையும் வளா்ச்சிக்கான தூண்கள்: பிரதமர் மோடி

நாட்டின் வளா்ச்சிப் பாதையில் தொழில்நுட்பமும் திறமையும் முக்கியத் தூண்களாகத் திகழ்வதாகப் பிரதமா் நரேந்திர மோடி தெரிவித்துள்ளாா்.

தொழில்நுட்பத்தால் நாட்டில் ஒருங்கிணைப்பை ஏற்படுத்த முடியும் என்றும் அவா் தெரிவித்தாா்.

ஐ.நா. உலக புவிசாா் தகவல் மாநாடு தெலங்கானா தலைநகா் ஹைதராபாதில் செவ்வாய்க்கிழமை நடைபெற்றது. அந்த மாநாட்டுக்காகப் பிரதமா் மோடி காணொலிச் செய்தியை அனுப்பியிருந்தாா். அதில் அவா் கூறியதாவது:

அரசின் சேவைகள் நாட்டில் உள்ள விளிம்புநிலை மக்களையும் சென்றடைய வேண்டும் என்ற நோக்கில் மத்திய அரசு தொடா்ந்து செயல்பட்டு வருகிறது. அதற்காகப் பல்வேறு திட்டங்களை அரசு செயல்படுத்தி வருகிறது. 45 கோடி பேருக்கு வங்கிக் கணக்கு தொடங்கப்பட்டது. இது அமெரிக்காவின் மக்கள்தொகையை விட அதிகம்.

நாட்டில் உள்ள 13.5 கோடிக்கும் அதிகமானோருக்குக் காப்பீட்டு வசதிகள் செய்து தரப்பட்டுள்ளன. இது பிரான்ஸின் மக்கள்தொகையைவிட அதிகம். நாட்டில் உள்ள 11 கோடி குடும்பங்களுக்கு சுகாதார வசதிகளும், 6 கோடிக்கும் அதிகமான குடும்பங்களுக்கு குடிநீா்க் குழாய் வசதியும் ஏற்படுத்தித் தரப்பட்டுள்ளன. அனைவருக்கும் அரசின் நலத் திட்டங்கள் கிடைப்பதை அரசு உறுதிசெய்து வருகிறது.

அதிக எண்ணிக்கையிலான இளைஞா்களைக் கொண்டுள்ள இந்தியா, பெரும் புத்தாக்கத் திறனைக் கொண்டுள்ளது. உலகின் தலைசிறந்த புத்தாக்க மையங்களில் ஒன்றாக இந்தியாவும் திகழ்கிறது. கடந்த 2021-ஆம் ஆண்டில் இருந்து நாட்டில் யுனிகாா்ன் புத்தாக்க நிறுவனங்களின் (விற்றுமுதல் மதிப்பு சுமாா் ரூ.7,500 கோடி) எண்ணிக்கை இருமடங்காகியுள்ளது. நாட்டில் உள்ள இளைஞா்களின் திறன் காரணமாகவே இது சாத்தியமானது.

தொழில்நுட்பத்தின் பலன்: நாட்டின் வளா்ச்சிப் பாதையில் தொழில்நுட்பமும் திறமையும் முக்கியத் தூண்களாகத் திகழ்கின்றன. தொழில்நுட்ப வசதிகளானது பெரும் மாற்றங்களைக் கொண்டு வருகிறது. இணையவழிப் பணப் பரிவா்த்தனையில் உலக அளவில் இந்தியா முதலிடத்தில் உள்ளது. நாட்டில் சிறு கடைகளில்கூட இணையவழிப் பணப் பரிவா்த்தனை வசதி உள்ளது.

கரோனா தொற்று பரவல் காலத்தில் தொழில்நுட்பம் ஏழைகளுக்குப் பெருமளவில் பலனளித்தது. ஜன் தன் வங்கிக் கணக்கு-ஆதாா் எண்-கைப்பேசி ஆகியவற்றின் ஒருங்கிணைப்பால் அரசின் நிதியுதவியானது மக்களின் வங்கிக் கணக்குக்கே நேரடியாகச் சென்றடைந்தது. அதனால் 80 கோடிக்கும் அதிகமான மக்கள் பலனடைந்தனா்.

தரவுகள் பகிா்வு: உலக நாடுகள் தங்களுக்குள் ஒத்துழைத்து நடந்து கொள்ள வேண்டும் என்பதை கரோனா தொற்று பரவல் உணா்த்தியுள்ளது. ஐ.நா. உள்ளிட்ட சா்வதேச அமைப்புகள் அனைத்து நாடுகளுக்கும் வளங்கள் சென்று சோ்வதை உறுதி செய்ய வேண்டும். முக்கியமாக, பருவநிலை மாற்றத்துக்கு எதிரான போராட்டம், தொழில்நுட்பப் பரிமாற்றம் உள்ளிட்டவற்றில் ஐ.நா. தலைமை வகிக்க வேண்டும்.

புவிசாா் தொழில்நுட்பத்தை மையமாகக் கொண்டு துரிதசக்தி திட்டம், எண்ம பெருங்கடல் திட்டம் உள்ளிட்டவற்றை அரசு செயல்படுத்தி வருகிறது. அத்தொழில்நுட்பத்தின் மூலமாகப் பெறப்படும் தகவல்களை அண்டை நாடுகளுடனும் இந்தியா பகிா்ந்துகொண்டு வருகிறது.

தரவுகளின் பயன்பாடு: புவிசாா் தொழில்நுட்பத்தின் தரவுகளானது ட்ரோன்களின் பயன்பாட்டை ஊக்குவித்தது. அத்தரவுகள் அனைவருக்கும் எளிதில் கிடைப்பதற்கான நடவடிக்கைகளை அரசு மேற்கொண்டு வருகிறது. புவிசாா் தரவுகள் காரணமாக விண்வெளித் துறையானது தனியாா் பங்கேற்புக்கும் திறந்துவிடப்பட்டுள்ளது.

கிராமங்களில் நிலங்களை அளவிடுவதற்கு ட்ரோன்களை இந்தியா பயன்படுத்தி வருகிறது. அத்தரவுகளைக் கொண்டு விவசாயிகள் சொத்து அட்டைகளைப் பெற்று வருகின்றனா். அரசின் வீட்டுவசதித் திட்டத்தின் கீழ் இதுவரை சுமாா் 2.4 கோடி ஏழைக் குடும்பங்களுக்கு வீடுகள் கட்டித் தரப்பட்டுள்ளன. அவற்றில் சுமாா் 70 சதவீத வீடுகளுக்கு உரிமையாளா்களாகப் பெண்களே உள்ளனா்.

நீடித்த நகா்ப்புற வளா்ச்சி, பேரிடா் மேலாண்மை, பருவநிலை மாற்றத்தின் விளைவுகளைக் கண்டறிதல், காடுகள் மேலாண்மை, நீா் மேலாண்மை, காடுகள் அழிப்பைத் தடுத்தல், உணவுப் பாதுகாப்பு உள்ளிட்டவற்றுக்கும் புவிசாா் தரவுகள் முக்கியப் பங்கு வகிக்கின்றன என்றாா் பிரதமா் மோடி.