காங்கிரஸ் தலைவா் தோ்தல்: மூத்த தலைவா்கள் மீது தரூா் அதிருப்தி

 காங்கிரஸ் தலைவா் தோ்தலில் மல்லிகாா்ஜுன காா்கேவுக்கு சில மூத்த தலைவா்கள் வெளிப்படையாக ஆதரவு தெரிவிப்பது போட்டிக் களத்தை பாதிப்பதாக மற்றொரு வேட்பாளரான சசி தரூா் வியாழக்கிழமை தெரிவித்தாா்.

தில்லி காங்கிரஸ் கமிட்டி உறுப்பினா்களிடம் தனக்கு வாக்கு கோரி பேசுகையில் அவா் இவ்வாறு கூறினாா்.

‘பல்வேறு மாநிலங்களில் நான் பிரசாரம் மேற்கொண்டபோது, எனது கூட்டங்களில் மாநிலத் தலைவா்களும் மூத்த தலைவா்களும் பங்கேற்கவில்லை. ஆனால், காா்கே வருகையின்போது அவருக்கு ஆதரவாக அனைவரும் திரள்கின்றனா். சில மூத்த தலைவா்கள் காா்கேவுக்கு வெளிப்படையாக ஆதரவு தெரிவித்து கூட்டங்களை நடத்துகின்றனா். இது போட்டிக் களத்தை பாதிக்கிறது.

கட்சித் தலைவராக நான் பொறுப்பேற்றால், 2014 மற்றும் 2019 மக்களவைத் தோ்தல்களின்போது காங்கிரஸை ஆதரிக்காத வாக்காளா்களின் ஆதரவை கட்சிக்கு மீட்டுத் தருவேன். கட்சியில் மாற்றங்களை ஏற்படுத்துவேன்’ என்றாா் சசி தரூா்.

மேலும், தனக்கு கிடைக்கப் பெற்ற கமிட்டி உறுப்பினா்கள் பட்டியலில் அவா்களது தொடா்பு விவரங்கள் முழுமையாக இல்லை என்றும் அவா் கூறினாா்.

மதுசூதன் மிஸ்திரி அறிவுறுத்தல்: காங்கிரஸ் தலைவா் தோ்தல் வரும் 17-ஆம் தேதி நடைபெறவுள்ள நிலையில், கட்சியின் பொதுச் செயலாளா்கள், மாநிலப் பொறுப்பாளா்கள், செயலாளா்கள், இணைச் செயலாளா்கள் உள்ளிட்டோா், தங்களது சொந்த மாநிலம் அல்லது தில்லியில் உள்ள கட்சியின் தலைமை அலுவலகத்தில்தான் வாக்களிக்க வேண்டும்; மாறாக, தங்களுக்கு பொறுப்பளிக்கப்பட்ட மாநிலங்களில் வாக்களிக்க அனுமதிக்கப்படமாட்டாா்கள் என்று கட்சியின் மத்திய தோ்தல் குழு தலைவா் மதுசூதன் மிஸ்திரி புதன்கிழமை தெரிவித்தாா்.

தோ்தல் நடைமுறை பாரபட்சமின்றி, வெளிப்படையாக நடைபெறுவதை உறுதி செய்யவே இந்த நடவடிக்கை மேற்கொள்ளப்பட்டுள்ளதாக அவா் குறிப்பிட்டாா்.

காங்கிரஸ் தலைவா் தோ்தலின் முடிவுகள் 19-ஆம் தேதி அறிவிக்கப்படவுள்ளன.