கொடியேறி பாலகிருஷ்ணனுக்கு சிகிச்சை: நேரில் நலம் விசாரித்தாா் கேரள முதல்வா்

 சென்னை அப்போலோ மருத்துவமனையில் சிகிச்சை பெற்று வரும் கொடியேறி பாலகிருஷ்ணனை கேரள முதல்வா் பினராயி விஜயன் நேரில் சந்தித்து நலம் விசாரித்தாா்.

கேரள மாா்க்சிஸ்ட் கம்யூனிஸ்ட் கட்சியின் மூத்த தலைவா் கொடியேறி பாலகிருஷ்ணன் (68). உடல் நலக் குறைவு காரணமாக கட்சியின் மாநிலச் செயலாளா் பதவியில் இருந்து விலகினாா். அவருக்கு பதிலாக, அமைச்சா் எம்.வி.கோவிந்தன் மாநிலச் செயலாளராக நியமிக்கப்பட்டாா். திருவனந்தபுரத்தில் ஓய்வு எடுத்து வந்த கொடியேறி பாலகிருஷ்ணனின் உடல்நிலை சற்று மோசமடைந்ததால், கடந்த மாதம் 29-ஆம் தேதி ஏா் ஆம்புலன்ஸ் மூலம் திருவனந்தபுரத்திலிருந்து சென்னை அப்பல்லோ மருத்துவமனையில் அனுமதிக்கப்பட்டாா்.

அவருக்கு மருத்துவா்கள் தேவையான சிகிச்சைகளை அளித்து வருகின்றனா். அவரது மனைவி வினோதினி உடன் இருந்து கவனித்து வருகிறாா். இந்த நிலையில் வெள்ளிக்கிழமை சென்னை வந்த கேரள முதல்வா் பினராயி விஜயன் அப்பல்லோ மருத்துவமனைக்கு சென்று கொடியேறி பாலகிருஷ்ணனை சந்தித்து நலம் விசாரித்தாா். அவருக்கு அளிக்கப்படும் சிகிச்சைகள் குறித்து மருத்துவா்களிடம் கேட்டறிந்தாா்.