சிக்கிம் மாநிலத்தில் ராணுவ வாகனம் விபத்துக்குள்ளானதில் 16 ராணுவ வீரர்கள் பலியானார்கள்.
சிக்கிம் மாநிலம், சாட்டன் என்ற பகுதியிலிருந்து ராணுவ வீரர்கள் 3 வாகனங்களில் தாங்கு பகுதியை நோக்கி இன்று காலை புறப்பட்டனர். செமா என்கிற பகுதியில் ஒரு வளைவில் வாகனங்கள் சென்றுகொண்டிருந்தபோது அதில் ஒரு வாகனம் மட்டும் திடீரென கட்டுப்பாட்டை இழந்து பள்ளத்தாக்கில் விழுந்து விபத்துக்குள்ளானது.
இதையும் படிக்க- மூக்கு வழியே கரோனா தடுப்பு மருந்து: மத்திய அரசு ஒப்புதல்
உடனடியாக சம்பவ இடத்தில் மீட்புப் பணிகள் தீவிரப்படுத்தப்பட்டன. இருப்பினும் இந்த விபத்தில் 16 ராணுவ வீரர்கள் பலியானதாக இந்திய ராணுவத் தரப்பில் தெரிவிக்கப்பட்டுள்ளது. மேலும் 4 பேர் காயமடைந்த நிலையில் மீட்கப்பட்டனர். தொடர்ந்து அவர்களுக்கு சிகிச்சை அளிக்கப்பட்டு வருகிறது.
சிக்கிமில் நடந்த விபத்தில் ராணுவ வீரர்கள் பலியானது மிகுந்த வேதனை அளிக்கிறது. வாகன விபத்தில் 16 ராணுவ வீரர்கள் பலியானதற்கு மத்திய பாதுகாப்புத்துறை அமைச்சர் ராஜ்நாத் சிங் இரங்கல் தெரிவித்துள்ளார்.