ஓபிசி பேராசிரியர்கள் விவகாரம்: மக்களவையில் விவாதிக்க மாணிக்கம் தாகூர் நோட்டீஸ்

மத்திய பல்கலைக்கழகங்களில் மிகவும் பிற்படுத்தப்பட்டோர் பிரிவு(ஓபிசி) பேராசிரியர்களின் சதவிகிதம் குறைவாக உள்ள விவகாரத்தை மக்களவையில் விவாதிக்க கோரி காங்கிரஸ் எம்.பி. மாணிக்கம் தாகூர் ஒத்திவைப்பு நோட்டீஸ் வழங்கியுள்ளார்.

நாடாளுமன்ற உறுப்பினர் ஒருவரின் கேள்விக்கு பதிலளித்த மத்திய கல்வி இணையமைச்சர், நாட்டில் உள்ள 45 மத்திய பல்கலைக்கழகங்களில் 4 சதவிகிதம் பேராசிரியர்கள் மட்டுமே மிகவும் பிற்படுத்தப்பட்டோர் வகுப்பை(ஓபிசி) சேர்ந்தவர்கள் பணிபுரிகிறார்கள் என்று தெரிவித்திருந்தார்.

பட்டியல் சமூகத்தை சேர்ந்த பேராசிரியர்கள், இணை பேராசிரியர்களின் எண்ணிக்கையைவிட ஓபிசி பிரிவுனரின் எண்ணிக்கை குறைவு என்பது தெரியவந்துள்ளது.

இந்நிலையில், மக்களவையில் மற்ற அலுவல்களை ஒத்திவைத்துவிட்டு மத்திய பல்கலைக்கழக பேராசிரியர்கள் விவகாரம் குறித்து விவாதிக்க கோரி விருதுநகர் தொகுதியின் காங்கிரஸ் எம்.பி. மாணிக்கம் தாகூர் ஒத்திவைப்பு நோட்டீஸ் வழங்கியுள்ளார்.

அதேபோல், சீனாவுடனான எல்லைப் பிரச்னை குறித்து விவாதிக்க கோரி காங்கிரஸ் எம்.பி. மனிஷ் திவாரியும் நோட்டீஸ் அளித்துள்ளார்.