தன்னைக் கொல்ல மகாராஷ்டிர மாநில முதல்வரின் மகன் ஸ்ரீகாந்த் ஷிண்டே கூலிப்படையை ஏவி விட்டுள்ளதாக சிவசேனை கட்சியின் செய்தித் தொடர்பாளரும், எம்பியுமான சஞ்சய் ரெளத் பரபரப்பு குற்றச்சாட்டை வெளியிட்டுள்ளார்.
மகாராஷ்டிர மாநிலத்தில் சிவசேனை கட்சியின் இரு பிரிவினருக்கு இடையே ஏற்பட்டுள்ள மோதல் நாளுக்குநாள் தீவிரமடைந்து வருகிறது. முதல்வர் ஏக்நாத் ஷிண்டே தலைமையிலான அணியினரை சிவசேனை கட்சியின் அதிகாரப்பூர்வ பிரிவினராக தேர்தல் ஆணையம் அங்கீகரித்த நிலையில் உத்தவ் தாக்கரே உச்சநீதிமன்றத்தில் முறையீடு செய்துள்ளார்.
இந்நிலையில் சிவசேனை கட்சியின் மூத்த தலைவரும், அக்கட்சியின் செய்தித் தொடர்பாளருமான சஞ்சய் ரெளத் பரபரப்பு கருத்தை வெளியிட்டுள்ளார்.
இதையும் படிக்க | ‘பாஜகவிற்கு உதவும் மம்தா’: ராகுல்காந்தி குற்றச்சாட்டு
மகாராஷ்டிர மாநில துணை முதல்வர், மும்பை, தாணே காவல்துறை ஆணையருக்கு அவர் எழுதியுள்ள கடிதத்தில் மகாராஷ்டிர மாநில முதல்வர் ஏக்நாத் ஷிண்டேவின் மகன் ஸ்ரீகாந்த் ஷிண்டே தன்னைக் கொல்ல தாணேவைச் சேர்ந்த கூலிப்படை தலைவன் ராஜா தாகூரிடம் பேரம் பேசியுள்ளதாகத் தெரிவித்துள்ளார்.
சஞ்சய் ரெளத்தின் இந்த குற்றச்சாட்டு அம்மாநில அரசியலில் பரபரப்பை ஏற்படுத்தியுள்ளது. இதுதொடர்பாக பேசிய அவர், “ஏக்நாத் ஷிண்டே ஆட்சிக்கு வந்தபிறகு தனக்கு வழங்கப்பட்டு வந்த காவல்துறை பாதுகாப்பு திரும்பப் பெறப்பட்டு விட்டது. எனினும் அரசியல்ரீதியிலான இந்த நடவடிக்கைக்கு தான் புகார் எதுவும் எழுப்பவில்லை. மகாராஷ்டிர மாநிலத்தின் தற்போதைய சூழலில் இதனை பொது கவனத்திற்கு கொண்டு வரவேண்டி உள்ளது” எனக் குறிப்பிட்டார்.
சஞ்சய் ரெளத்தின் இந்த புகார் குறித்து பதிலளித்துள்ள முதல்வர் ஏக்நாத் ஷிண்டே, “இதுகுறித்து விரிவான விசாரணை நடத்தப்படும். அவரின் பாதுகாப்பை காவல்துறை உறுதி செய்யும்” எனத் தெரிவித்தார்.