திரிபுரா: காங்கிரஸ் வேட்பாளர் பட்டியல் வெளியீடு

திரிபுரா சட்டப்பேரவைத் தேர்தலில் போட்டியிடும் 17 வேட்பாளர்களை காங்கிரஸ் கட்சி இன்று அறிவித்துள்ளது. 

திரிபுராவில் 60 தொகுதிகளுக்கான 13-ஆவது சட்டப்பேரவைத் தோ்தல் பிப்ரவரி 16-ஆம் தேதி நடைபெறும் என்று அண்மையில் தோ்தல் ஆணையம் அறிவித்தது. வாக்கு எண்ணிக்கை மாா்ச் 2-ஆம் தேதி நடைபெற உள்ளது. ஜனவரி 30-ஆம் தேதி வேட்புமனு தாக்கல் நிறைவடையும் நிலையில், அவற்றின் மீதான பரிசீலனை ஜனவரி 31-ஆம் தேதி நடைபெறுகிறது. 

இதையும் படிக்க- “கள ஆய்வில் முதலமைச்சர்”: பிப்.1ல் வேலூர் மண்டலத்தில் தொடங்கி வைக்கிறார் முதல்வர் 

வேட்புமனுக்களைத் திரும்பப் பெற பிப்ரவரி 2-ஆம் தேதி கடைசி நாளாகும். எனவே அரசியல் கட்சிகள் வேட்பாளர்களை அறிவித்து வருகின்றன.  தேர்தலில் மார்க்சிஸ்ட் கம்யூனிஸ்ட் கட்சியுடன் கூட்டணி அமைத்து காங்கிரஸ் போட்டியிடுகிறது. இடதுசாரி முன்னணி 47 தொகுதிகளில் போட்டியிடுவதாக அறிவித்து 13 இடங்களை காங்கிரஸுக்கு விட்டுக் கொடுத்தது.

இந்த நிலையில் பேரவைத் தேர்தலில் போட்டியிடும் 17 வேட்பாளர்களை காங்கிரஸ் கட்சி இன்று அறிவித்துள்ளது. காங்கிரஸ் 4 தொதிகளுக்கு கூடுதலாக வேட்பாளர்களை அறிவித்துள்ளதால், அந்த இடங்களில் கூட்டணி கட்சிகளுக்கு இடையே நட்புரீதியான போட்டி ஏற்படும் சூழல் எழுந்துள்ளது என்பது குறிப்பிடத்தக்கது.