காஷ்மீர் விவகாரத்தில் ஜவாஹர்லால் நேரு மீதான மோடி அரசின் குற்றச்சாட்டுகளை அன்றைய காலகட்ட காஷ்மீர் கடிதங்கள் பொய்யாக்குவதாக தகவல் வெளியாகியுள்ளது.
காஷ்மீர் விவகாரத்தில் நேரு தனது ராணுவ மூத்த அதிகாரியின் அறிவுரைப்படி செயல்பட்டார் என இங்கிலாந்து நாளேடான கார்டியன் குறிப்பிட்டுள்ளது.
இந்தியாவின் முதல் பிரதமரான ஜவாஹர்லால் நேரு தனது ராணுவ மூத்த அதிகாரி அறிவுறுத்தலின்படி, பாகிஸ்தானுடன் 1948ஆம் ஆண்டு நடைபெற்ற போரை நிறுத்திக்கொண்டார்.
காஷ்மீரின் சிறப்பு அந்தஸ்தை கடந்த 2019ஆம் ஆண்டு பிரதமர் நரேந்திர மோடி தலைமையிலான அரசு திரும்பப் பெறுவதாக அறிவித்தது. பாகிஸ்தானியர்களிடமிருந்து கூடுதல் நிலப்பரப்பை கைப்பற்றாமல் நேரு தவறு செய்துவிட்டதாக பாஜக அரசு குற்றம் சாட்டியது.
1948ஆம் ஆண்டில் இந்தியா - பாகிஸ்தான் இடையான போரில், இந்தியா பாகிஸ்தானை வெல்லும் நிலையில் இருந்ததாகவும், அப்போது போர் நிறுத்தம் தொடர்பாக நேரு அரசு, ஐக்கிய நாடுகள் சபையை அணுகியது மிகப்பெரிய தவறு என தற்போதைய உள் துறை அமைச்சர் அமித் ஷா குற்றம் சாட்டியிருந்தார்.
ஆனால், நேரு மீதான பாஜகவின் இந்த குற்றச்சாட்டுகளை, பல ஆண்டுகளாக பராமரித்து வகைப்படுத்தி வைக்கப்பட்டிருந்த காஷ்மீர் கடிதங்கள் பொய்யாக்குவதாக கார்டியன் அறிவித்துள்ளது.
நேரு தனது மூத்த ராணுவ அதிகாரியால் 1948 ஆம் ஆண்டு பாகிஸ்தானுடனான போர் நிறுத்தத்திற்கு ஒப்புக்கொள்ளுமாறு வலியுறுத்தப்பட்டதை அந்தக் கடிதங்கள் சுட்டிக்காட்டுவதாக குறிப்பிட்டுள்ளது.
சுதந்திரத்துக்குப் பிறகான நேரு ஆட்சியில், ராணுவ ஜெனரல் சர் பிரான்சிஸ் ராபர்ட் ராய் புச்சரின் கடிதங்கள் இதனை உறுதிப்படுத்துகின்றன.
1948ஆம் ஆண்டு நவம்பர் 28ஆம் தேதி நேருவுக்கு புச்சர் எழுதிய கடிதத்தில், காஷ்மீரில் இந்திய ராணுவ வீரர்கள் சோர்வடைந்துள்ளனர். ஒட்டுமொத்த ராணுவத்தையும் துடிப்புடன் இயங்கவைப்பது சாத்தியமில்லை. ராணுவ வீரர்கள் பலவீனமாகவும், இளம் வீரர்கள் போதிய பயிற்சி இன்றியும் உள்ளனர். ராணுவ வீரர்களுக்கு உயிரூட்டும் வகையில் தற்போது ஓய்வு தேவைப்படுகிறது என அந்தக் கடிதத்தில் குறிப்பிடப்பட்டுள்ளது.
அதற்கு நேரு அளித்த பதில் கடிதத்தையும் கார்டியன் சுட்டிக்காட்டியுள்ளது. அதாவது, 1948 டிசம்பர் 23-ல் நேரு எழுதிய பதில் கடிதத்தில், தற்காப்பு நிலையில் இருக்கும் பாகிஸ்தானை எஞ்சியுள்ள ராணுவ வீரர்களைக் கொண்டு எதிர்ப்பது அரிது என்பதை புரிந்துகொள்கிறேன் எனக் குறிப்பிடப்பட்டுள்ளது.
மேலும், காஷ்மீரின் வான்வழிப் பரப்பில் குண்டுகளை வீசித் தாக்குதல் நடத்த பாகிஸ்தான் திட்டமிட்டுள்ளதாக வந்த தகவல் சுட்டிக்காட்டப்பட்டுள்ளது. அதேவேளையில் பாகிஸ்தான் தனது சாலை அமைப்பை விரிவாக்கம் செய்து இந்தியாவுக்கு எதிராக பலத்தைப் பெருக்கி வருவதாகவும் தகவல் வெளியாகிறது என சுட்டிக்காட்டப்பட்டுள்ளது.
டிசம்பர் 28 தேதியிடப்பட்ட புச்சரின் பதில் கடிதத்தில், பாகிஸ்தானின் சாலை அமைக்கும் பணிகளைத் தடுக்க ராணுவ நடவடிக்கை எடுக்க முடியாது என்று நான் கருதுகிறேன். இந்தப் பிரச்னைக்கு அரசியல் அணுகுமுறையை நான் பரிந்துரைக்கிறேன் எனக் குறிப்பிடப்பட்டுள்ளது.
இதனைத் தொடர்ந்து, போர் நிறுத்தத்துக்காக நேரு ஐ.நா. சபையை அணுகியதன் விளைவாக 1949 ஜனவரி 1ஆம் தேதி பாகிஸ்தான் உடனான போர் முடிவுக்கு வந்தது.
இந்தக் கடிதங்கள் மூலம் இந்திய ராணுவ மூத்த அதிகாரியின் அறிவுறுத்தலின்படி நேரு செயல்பட்டது உறுதியாகியுள்ளதாக கார்டியன் விளக்கியுள்ளது.
காஷ்மீரின் இந்தக் கடிதங்களை குறிப்பாக புச்சர் எழுதிய கடிதங்களை, அபாயகரமானது எனக் குறிப்பிட்டு மோடி அரசு வெளியிடாமல் பாதுகாக்க முயற்சிப்பதாக கடந்த மாதம் கார்டியன் விமர்சித்திருந்தது குறிப்பிடத்தக்கது.