கர்நாடக முதல்வர்: பெங்களூருவில் நாளை அறிவிப்பு?

பெங்களூருவில் கர்நாடக முதல்வர் பெயரை நாளை காங்கிரஸ் தலைவர் மல்லிகார்ஜுன கார்கே அறிவிக்கவுள்ளதாக தகவல்கள் வெளியாகியுள்ளது.

கர்நாடக சட்டப்பேரவைத் தேர்தலில் காங்கிரஸ் கட்சி தனிப் பெரும்பான்மையுடன் ஆட்சியைப் பிடித்துள்ளது.

இந்நிலையில், முதல்வர் பதவிக்கான போட்டியில் முன்னாள் முதல்வர் சித்தராமையாவும், காங்கிரஸ் மாநிலத் தலைவர் டி.கே.சிவக்குமாரும் காய்களை நகா்த்தி வருகிறாா்கள்.

அரசியல் பரபரப்புக்கு மத்தியில் இருவரும் தில்லியில் முகாமிட்டுள்ள நிலையில், மல்லிகார்ஜுன கார்கேவை அவரது இல்லத்தில் சந்தித்து தனித்தனியே இன்று மாலை ஆலோசனை நடத்தினர்.

இந்நிலையில், முதல்வர் குறித்த முடிவை இதுவரை கார்கே எடுக்கவில்லை என்றும், காங்கிரஸ் மூத்த தலைவர்கள் சோனியா காந்தி, ராகுல் காந்தி உள்ளிட்டோரை கலந்து ஆலோசித்து இன்றுக்குள் இறுதி முடிவு எடுக்கப்படும் என்றும் கூறப்படுகிறது.

இதனைத் தொடர்ந்து, பெங்களூருவில் நாளை செய்தியாளர்கள் சந்திப்பின்போது முதல்வரின் பெயரை கார்கே அறிவிக்க திட்டமிட்டுள்ளதாக தகவல்கள் வெளியாகியுள்ளது.