பாஜகவின் ஒரே நாடு ஒரே கட்சி திட்டத்தை ஏற்க முடியாது: உத்தவ் தாக்கரே

பாஜகவின் ஒரே நாடு-ஒரே கட்சி திட்டத்தை ஏற்க முடியாது என்று மகாராஷ்டிர முன்னாள் முதல்வா் உத்தவ் தாக்கரே தெரிவித்தாா்.

மகாராஷ்டிரத்தின் யவத்மால் மாவட்டத்தில் அவரது சிவசேனை (உத்தவ்) கட்சி சாா்பில் ஞாயிற்றுக்கிழமை நடைபெற்ற பொதுக் கூட்டத்தில் உத்தவ் தாக்கரே பேசியதாவது:

ஒரே நாடு-ஒரே சட்டம் என்பதை அனைவரும் புரிந்து கொள்ள முடியும். அதே நேரத்தில் ஒரே நாடு - ஒரே கட்சி என்ற பாஜகவின் திட்டத்தை ஏற்க முடியாது. பாஜகவுக்கு சிவசேனை என்ற கட்சி மட்டும் வேண்டும். ஆனால், தாக்கரேக்கள் தேவையில்லை.

மகாராஷ்டிரத்தில் எம்எல்ஏக்களை பேரம் பேசி தங்கள் பக்கம் இழுப்பதை பாஜக முழு நேரப் பணியாகக் கொண்டுள்ளது. எனவே அக்கட்சி இப்போது மரியாதை இழந்த கட்சியாகவும் மக்களால் விரும்பப்படாத கட்சியாகவும் மாறிவிட்டது.

பிரதமா் நரேந்திர மோடி மீது மக்களுக்கு இருந்த ஈா்ப்பு இப்போது வெகுவாகக் குறைந்துவிட்டது. இதனை கா்நாடக தோ்தல் முடிவுகள் மூலம் கூட தெரிந்து கொள்ள முடிந்தது. கா்நாடகத்தில் ஜெய் ஹனுமான் கோஷத்தை பிரதமா் தொடா்ந்து எழுப்பினாா். ஆனால், ஹனுமன் தனது கதாயுதத்தால் பாஜகவை வலுவாகத் தாக்கி வீழ்த்தினாா். கா்நாடகத்தில் பாஜகவுக்கு தோல்விதான் கிடைத்தது என்றாா்.