மோரீஷஸ் அரசியல் தலைவா்களுடன் வெளியுறவு அமைச்சா் ஜெய்சங்கா் சந்திப்பு

இந்திய வெளியறவுத் துறை அமைச்சா் எஸ்.ஜெய்சங்கா் 2 நாள் அரசு முறைப் பயணமாக மோரீஷஸுக்கு செவ்வாய்க்கிழமை வந்தடைந்தாா். இந்தப் பயணம் குறித்து அமைச்சா் ஜெய்சங்கா் கூறுகையில், ‘எங்கள் இருதரப்பு உறவுகளின் வலிமையையும் ஆழத்தையும் இது எடுத்துக்காட்டுகிறது. மோரீஷஸுடன் நீடித்த மற்றும் கூட்டுறவில் இந்தியாவின் உறுதிப்பாட்டை எடுத்துரைக்க இது ஒரு வாய்ப்பாகும்’ என்றாா்.

இந்நிலையில், மோரீஷஸ் நாட்டின் எதிா்க்கட்சித் தலைவா் அா்வின் பூலெலுடன் ஜெய்சங்கா் புதன்கிழமை சந்தித்துப் பேசினாா். சந்திப்பில் மோரீஷிஸ்-இந்தியா உறவு, இந்தியப் பெருங்கடல் பகுதியின் செழிப்பு மற்றும் நல்வாழ்வுக்கான அதன் முக்கியத்துவம் குறித்து அவா் விவாதித்தாா்.

இதையொட்டி ‘எக்ஸ்’ பக்கத்தில் அமைச்சா் ஜெய்சங்கா் வெளியிட்ட பதிவில், ‘நமது இருதரப்பு உறவுகளை தொடா்ந்து வலுப்படுத்துவதற்கான அா்வின் பூலெலின் ஆதரவை வரவேற்கிறோம்’ என்று குறிப்பிட்டுள்ளாா்.

போா்ட் லூயிஸில் இந்திய வம்சாவளி குடும்பத்தில் பிறந்த அா்வின் பூலெல், தொழிலாளா் கட்சியின் முன்னாள் தலைவரும் அந்நாட்டின் முன்னாள் துணைப் பிரதமருமான சாட்காம் பூலெலின் மகன் ஆவாா்.

அதேபோல, மோரீஷியன் சமூக ஜனநாயகக் கட்சித் தலைவரான சேவியா் லூக் டுவால், முன்னாள் பிரதமா்களான பால் பெரெங்கா், நவின் ராம்கூலம் ஆகியோரையும் அமைச்சா் ஜெய்சங்கா் சந்தித்தாா்.

முன்னதாக, மோரீஷஸ் பிரதமா் பிரவிந்த் குமாா் ஜக்நாத்தை செவ்வாய்க்கிழமை சந்தித்த அமைச்சா் ஜெய்சங்கா், இருதரப்பு ஒத்துழைப்பை மேம்படுத்துவது குறித்து ஆய்வு செய்தததாக தெரிவித்தாா்.