காங்கிரஸ் தேர்தல் அறிக்கையை நகலெடுத்த பாஜக பட்ஜெட் : ப. சிதம்பரம்

புது தில்லி: மக்களவைத் தேர்தலின்போது காங்கிரஸ் கட்சி வெளியிட்ட தேர்தல் அறிக்கையைத்தான், தற்போது மத்திய பட்ஜெட் என பாஜக படித்திருக்கிறது என்று காங்கிரஸ் மூத்த தலைவரும், முன்னாள் மத்திய நிதியமைச்சருமான ப. சிதம்பரம் விமரிசித்துள்ளார்.

2024 - 25ஆம் ஆண்டுக்கான மத்திய பட்ஜெட்டை நிதியமைச்சர் நிர்மலா சீதாராமன் நாடாளுமன்றத்தில் இன்று தாக்கல் செய்தார்.

மத்திய பட்ஜெட் குறித்து தன்னுடைய எக்ஸ் பக்கத்தில் கருத்துத் தெரிவித்திருக்கும் காங்கிரஸ் மூத்த தலைவர் ப. சிதம்பரம், 2024ஆம் ஆண்டு மக்களவைத் தேர்தல் முடிவுகளால், காங்கிரஸ் தேர்தல் அறிக்கையை பாஜக இன்று வாசித்திருக்கிறது என்பதை இங்கு மகிழ்ச்சியோடு தெரிவித்துக் கொள்கிறேன்.

ஏஞ்சல் வரி ரத்து செய்யப்படும் என்று மத்திய நிதியமைச்சர் அறிவித்ததும் மகிழ்ச்சி அடைந்தேன். காங்கிரஸ் கட்சி, இந்த ஏஞ்சல் வரியை ரத்து செய்ய வேண்டும் என்று பல ஆண்டுகாலமாக வேண்டுகோள் விடுத்து வந்தது. இது தொடர்பாக மக்களவைத் தேர்தலின்போது காங்கிரஸ் கட்சி வெளியிட்ட தேர்தல் அறிக்கையின் 31வது பக்கத்தில் உள்ளதை இங்கே சுட்டிக்காட்டுகிறேன்.

காங்கிரஸ் அறிக்கையின் 30வது பக்கத்தில் கோடிட்டுக் காட்டப்பட்டுள்ள வேலைவாய்ப்புடன் இணைந்த ஊக்கத்தொகை திட்டத்தையும் மத்திய நிதியமைச்சர் அறிவித்திருப்பதில் பெரும் மகிழ்ச்சி அடைகிறேன்.

மேலும், மத்திய அரசின் பட்ஜெட்டில், இளைஞர்களுக்கு உதவித் தொகையுடன் கூடிய பயிற்சி அளிக்கப்படும் என்ற திட்டத்தை நிதியமைச்சர் அறிமுகப்படுத்தியதை வரவேற்கிறேன். இந்த திட்டம், காங்கிரஸ் தேர்தல் அறிக்கையின் 11வது பக்கத்தில் குறிப்பிடப்பட்டுள்ளது.

தொடர்ந்து, காங்கிரஸ் தேர்தல் அறிக்கையில் உள்ள வேறு சில திட்டங்களையும் மத்திய நிதியமைச்சர் பயன்படுத்தியிருந்தால் நான் மிகுந்த மகிழ்ச்சியடைந்திருப்பேன். அவர் தவறவிட்ட சில வாய்ப்புகளை விரைவில் பட்டியலிடுவேன் என்றும் பதிவிட்டுள்ளார்.

நிதியமைச்சர் நிர்மலா சீதராமன் தாக்கல் செய்த மத்திய பட்ஜெட்டில் ஏஞ்சல் வரி விதிப்பு முறை முற்றிலும் அகற்றப்படுவதாக அறிவிக்கப்பட்டுள்ளது.

பங்குச் சந்தையில் பட்டியலிடப்படாத நிறுவனங்கள், திரட்டும் மூலதனத்துக்கு விதிக்கப்படுவது ஏஞ்சல் வரி. புதிய நிறுவனங்கள் முதலீட்டாளர்களிடமிருந்து நிதி கோரினால், ஏஞ்சல் வரி விதிப்பு நடைமுறையில் இருந்தது. இது ரத்து செய்யப்படுகிறது.

உற்பத்தித் துறையில் 5 ஆண்டுகளில் 1 கோடி இளைஞர்களுக்கு வேலை வாய்ப்பு பயிற்சி தரப்படும். வேலை வாய்ப்பு பயிற்சி பெறும் இளைஞர்களுக்கு மாதம் ரூ.5,000 உதவித் தொகை தரப்படும் என்றும் மத்திய பட்ஜெட்டில் கூறப்பட்டுள்ளது.

காங்கிரஸ் தேர்தல் அறிக்கையின்போது, மகளிர், இளைஞர்கள், விவசாயிகள் என ஐந்து பிரிவினருக்கான கொள்கைகள் அறிவிக்கப்பட்டது போல, மத்திய பட்ஜெட்டை வாசிக்கத் தொடங்கிய நிதியமைச்சர் நிர்மலா சீதாராமன், மத்திய பட்ஜெட், பெண்கள், இளைஞர்கள், விவசாயிகள், தொழில்துறை என ஒவ்வொரு பிரிவினருக்குமான திட்டங்களாக அறிவிக்கப்படும் என்று அறிமுகப்படுத்தினார்.