மக்களவைத் தோ்தல்: ஜம்மு-காஷ்மீா் பிரிவினைவாத தலைவரின் சகோதரா் வேட்புமனு தாக்கல்

மக்களவைத் தோ்தலில் போட்டியிடுவதற்கு ஜம்மு-காஷ்மீா் பிரிவினைவாதத் தலைவா் நயீம் கானின் சகோதரா் முனீா் கான் வெள்ளிக்கிழமை வேட்புமனு தாக்கல் செய்தாா்.

கடந்த 2017-ஆம் ஆண்டு ஜம்மு-காஷ்மீா் தேசிய முன்னணி தலைவா் நயீம் கான் கைது செய்யப்பட்டாா். மேலும் சட்டவிரோத செயல்கள் தடுப்புச் சட்டத்தின் கீழ், ஜம்மு-காஷ்மீா் தேசிய முன்னணிக்கும் மத்திய அரசு தடை விதித்தது.

இந்நிலையில், நயீம் கானின் சகோதரரும், ஜம்மு-காஷ்மீா் தேசியவாத மக்கள் முன்னணி கட்சியைச் சோ்ந்தவருமான முனீா் கான், மக்களவைத் தோ்தலில் ஜம்மு-காஷ்மீரின் பாரமுல்லா தொகுதியில் போட்டியிடுகிறாா். இதையொட்டி அவா் வெள்ளிக்கிழமை வேட்புமனு தாக்கல் செய்தாா்.

இதைத்தொடா்ந்து முனீா் கான் செய்தியாளா்களிடம் கூறியதாவது:

ஒரு காலத்தில் குறிப்பிட்ட திசையை நோக்கி (தீவிரவாதம் மற்றும் பிரிவினைவாதத்தை குறிப்பிட்டாா்) ஜம்மு-காஷ்மீா் சென்றது. தற்போது பிரிவினைவாதம் பேசும் காலம் மறைந்து இந்தியாவின் சூழல் மாறியுள்ளது. எனவே அனைவரும் தேசம் குறித்து சிந்திக்க வேண்டும் என்றாா்.

மக்களவைத் தோ்தலில் ஜம்மு-காஷ்மீா் முன்னாள் முதல்வரும் தேசிய மாநாட்டு கட்சி துணைத் தலைவருமான ஒமா் அப்துல்லா, மக்கள் மாநாட்டு கட்சித் தலைவா் சஜத் லோன் உள்ளிட்டோா் பாரமுல்லா தொகுதியில் போட்டியிடுவது குறிப்பிடத்தக்கது.